Prethodna kolumna
Slijedeća kolumna

Za dušu, za spomenek: Feder dame

Piše: Nevenka Gregurić

Denes, e otpreš tere novine ilji lučeš h teljevizor, pred očmi ti bleščiju sljike sakojačke pu



Denes, e otpreš tere novine ilji lučeš h teljevizor, pred očmi ti bleščiju sljike sakojačke puci. Suhe kaj čačkaljice, h pasu prežmeknjene kaj mravlje, a cecki za tere mam znaš da nebuju dojile pnjkrata. Čube su zdignjene zrak i napumpane kaj zglediju, oprosti mi bože, nebum rekla kaj. Dale su si jih pojedine podebljati i te fajn. Sigurne su čule da se je negda reklje:

„Čuvaj se babi z tenjkami čubami. Bolje da te kača hgrizne nek da ti za pleči spi.“
Obljeka su njim sakojačke blešeče i čečene krpice, a skupe kaj čemer. I gda pojedine hodiju ilji se popikavaju po takzvanami pistami i nosiju „fine“ obljeku, zglediju kaj da si obljeku obesil na afinger. A gda hodiju, bok moj, neznaš kaj bi čovek rekel. Niti je za plakati niti borme za smejati. Ljudi bi negda reklji da se tak hodi švajdrave. Negda se navieke pazilje na hod ljudi i, Bog poštuj sveti krst, živine. Gda bi čovek kupuval na siemu kravicu ilji kobiljicu, moral se ž nju sprehajati po siemu. Če bi živinče z teru nogu „zametalje“ teške bi našlje kupca.

I tak dok jedni švajdrave hodiju i kažeju obljeku i obuču sake felje, drugi lučeju i ne megneju od onuga kaj vidiju. Jedva se ščakaju da do takve obljeke dojdeju. Denes se takve ljudi, moderne obuvene i oblječenje, zove selebriti. Kaj te znači teške je te objasniti moje stare susede. Ona si je sama štiela pomoči tak kaj je rekla da bi te moglje biti po njenjem ovak, sele-briti ilji podbriti seljaki. Gda je bolje gruntala vidla je da ne paše jer malje teri seljak ima glatke ruke i ves je nacinfran. Ovi moderni i muški i ženski podbriti su po sa miesta, a h selu se zna gdoj si i kaj podbriva. Šlabekuvale sme tak moja stara suseda i ja i nikak niesem mogla praf da ju dopoviem kaj su te selebriti. Poklje kaj sem je probala povedati kak selebriti živiju, kak se ponašaju i kak oblačiju, njoj kak da se je vužgala svečica.

„Joj kaj ne veliš. Pak i h moje mladosti je bilje tak slične ženjski. Mi sme jih zvalji feder dame!“

Nasmejala se moja suseda i rekla da je sake selje imelj bar jednu feder damu. One su največ hodile h grad na posel, a unda su se i malje bolje mogle obljieči. Niesu delale na gruntu, gda niesu imele cajta. H jutre su h kmice prešle z cugem h grad i h kmice bi se vrnule. Služile su peneze i makar su jih morale davati starcem senek su si ostavljale nekaj za se. One su bile bolje obljiečene nek puce tere su bile same na gruntu. Niesu več čubanjke morale mazati z krep papierem, a obrve z sajami, nek su si mogle privuščiti kupljene šminke. Kupljena obljeka, obuča i šminka zdigla njim je nose h zrak. Deljejke oko njih bil je šnjof sakojačke parfine. Gda bi hodile po selu z visakemi petami po blatne i prašne pute, zibale su kak na fiedre. Radi toga su jih zvalji feder dame. Feder dame se baš niesu štele sakem družiti. Gda bi bile negde gde je bilje pune ljudi one bi zafrknule z nosem i stale po strani. Poviedala mi je tak moja suseda da su h njenjem selu bile dvie takve federdame. Hodile su skupa z cugem h grad na posel. Stanica na tere je cug stajal bila je deljejke. One i seljani teri su hodilji k cugu moralji su prejti hnogi prielaz h plotu na putu do stanice.

Ljudi su negda bilji ograjeni, alji su na sakem mestu kud je išel pieški put napravilji prielaze kaj su prek njega ljudi moglji lježe prejti. I tak su te dvie feder dame sake jutre jambrale dok su čakalji cuga kak njihovi seljani smrdiju po švicu, štalje i kočaku. Jednamu selskomu huncutu te je prikipelje pak je jednu noč namazal par prielaze z gnjojem teruga je našel na gnjojniku i šekrietu. Kak su one z dugami kikljami išle prek prielaze sakuga su ljiepe z kikljami „pomele“. Dok su čakale cuga se je smrdelje. Po navade su z nosem frkale i špotale svoje seljane kak se ne pereju i radi toga smrdiju. A unda njim je huncut rekel da naj najprie polukneju sebe. Gda su vidle kak su njim kiklje se posrane skore jih je vudril šlok. Dečki su delalji ž njih bedaka i reklji da si niesu dobre zdigle kiklje gda su išle na stran. Do njih i drugih feder dami ljudi nič niesu držalji. Znalji su još reči:
„Z vuni juj, a z nutri fuj!“

Facebook

Zbog prometnih nesreća vozi se usporeno: -na 373. km autocest A1 Zagreb-Split-Ploče između čvorova VUČEVICA i DUGOPOLJE u smjeru Dubrovnika; -na državnoj cesti DC56 Klis-Grlo kod Klisa; -a promet je prekinut na ŽC3034 u mjestu Lukarišće kod Dug...

 
iz valute
u valutu

Tečajna lista služi isključivo u informativne svrhe i podliježe promjeni bez prethodne najave. Zagorje.com ne može jamčiti točnost tečajne liste koju koristi konverter. Prije provođenja stvarnih transakcija potrebno je provjeriti trenutni tečaj kod službene ustanove. Tečajna lista dohvaćena je prema online podacima Hrvatske narodne banke.

mojtv.hr - kompletan tv program