Kak su Patricija i Sandra imele školske praznike, tak su zamjenile dan za noč. Po cjele dane spiju, osim kad ih zdignem da eventualno nekaj napraviju, a po noči onda nemreju spati. Pa su po cjele noči ili na fejsu, ili glediju filme, ili se igraju. Od njih dvije me to niti ne čudi. To je normalno za decu h pubertetu. Ali me iznenadila Gracia neku noč.

Žena i ja smo uz vrlo zanimljiv televizijski program zaspali h dnevnoj sobi. I h neko doba noči kad smo se zbudili i išli spat h spavaču sobu imeli smo kaj za videti. Gracija sedi na krevetu i gledi crtiče. Ne bi bilo nič čudno da nije bilo oko pol četiri h jutro. I več do jutra nije išla spat.

Iznenadila nas je i sa šminkanjem. Znali smo da bu jednog dana, kad-tad, ko i svaka pucka počela metati šminku po sebi. Več zna zeti ono kaj se mažeju obrve i namaže se skroz prek cijele glave. Ali uredno prejde po obrvama. I to se bez špigla, jer se h njemu još nemre videti. Zna si i usta namazati. Istina da je to i po centimetar sve oko usta namazano. Ali kad pogledate malo i stareše ženske, morete videti da ima i njih tere se tak namažeju.

Ja sam, fala na pitanju, bolje. Več ne boli jako. Sad se več i več svrbi. I nakon dva tjedna još nisam dobil otpusno pismo. A h njemu piše kad trebam dojti na kontrolu. I kaj sam če sam več trebal iti na kontrolu, a ja to ne znam? Problem je kaj nemrem još nič delati. Če okrenem glavu, ili se prignem ili če malo prejdem van počne me boljeti. Grdo je kaj več nemrem niti ležati. Ta dosada bu me hbila. Več ne znam e me glava boli od operacije ili od gledenja h televizor i kompjuter. Dobro je kaj več morem zinuti i skoro sve jesti. Taman h pravo vrijeme. Kad ima pune toga za jesti. Sreča pa sam strgal vagu pa ne znam kolko sam od onoga kaj sam h bolnici zgubil, natrag vrnul.
 
Prošli tjedan je udarna vijest bila kak je Čava novi ministar. To bi za cjelo Zagorje moglo biti dobro. I če bu za Zagorje napravil pol od onoga kolko je onaj ministar iz prošle vlasti napravil za svoj kraj treba mu zdiči veliki spomenik.