Prošli tjedan sam napisal kak sam dobro prešel s kupnjom mikrovalne i da sam imel sreče. Kratkoročno gledano s financijske strane sam dobro prešel. Platil sam ju manje nego kaj je pisalo na polici. I s te strane sam zadovoljan. S druge strane nije dobro. Znal sam da nekaj mora biti. Da ima nekakva kvaka. U čemu je problem?

Ja se bum s tom mikrovalnom streljil. Ona stara je imela dva gumba. Jednog na terome si rihtal kak jako hočeš da grije i drugoga na terome si odabral kak dugo bu grela. I gotovo. Dva gumba. I kraj priče. I grela je. Se si nutra mogel zgreti. Ova nova ima prek dvajst gumbi. I gdo bi popamtil teri je za kaj? Znam čemu služi onaj na terome piše start i onaj kaj na njemu piše stop. Na start se vužge, a na stop stane.

Ali… Normalno da furt postoji nekakav ali. Ali če hočete stisnuti start i pritisne ga nič se ne događa. Apsolutno nič. Da bi nekaj deli gret morate prije starta još barem jen gumb pritisnuti. Točno si upute moram skopirati i naljepiti na zid iza mikrovalne. Ipak je opčepoznato da čim si stareši to teže usvajaš nove tehnike i tehnologije.
 
Država je smislila još jen način kak da zašpara na betežnima. Prije če si bil betežen i če h najbližoj bolnici nisi mogel zbaviti to kaj trebaš, mogel si to zbaviti h nekoj drugoj bolnici. I za to si mogel od države dobiti povrat putnih troškova. Normalno, če si to iskal. Uvjet je bil da u jednom smjeru napraviš prek 30 kilometri. Onda su prije par mjeseci to samo malo zmenili.

H cjelom pravilniku teri opisuje između ostalog gdo i kak ima praf dobiti peneze su zmenili jedan jedini broj. Samo su 30 zmenili h 50. Nič posebno, bi rekli. Ali kaj to znači za nas tu h Zagorju? To znači da ak živite h Zaboku i h zabočkoj bolnici nemrte nekaj zbaviti morate iti h Zagreb.

Da bi došli do Zagreba morate ili sesti h cug, autobus ili auto. Za to morate ili kupiti kartu če idete s cugom ili autobusom, ili natankirati auto, ak idete s autom. Sad se vračamo na onu promjenu s 30 na 50 u spomenutom pravilniku.

Prije ste za gore navedeno mogli dobiti povrat putnih troškova. Jer je od Zaboka do Zagreba več od 30 kilometri. Sad več toga nema. Jer je manje od 50 kilometri. I tak je izmjena jedne jedine brojke postala još jedan dodatni teret ljudima. I to ne bilo kojima. Nego betežnima. Kaj da im nije dost to kaj su betežni?