Več neko vrijeme Gracija neče spati po noči. Hvečer zaspi i onda se h neko doba po noči zbudi. Pa se malo poigra s igračkama kaj ima h kindebetu, pa onda krene solistički koncert. Negda je pomoglo kad je mama dala cicu. Sad več ni to ne pomaže. Meni na rukama zaspi mam. Ali se zbudi čim ju denem h kinderbet. Več smo doma znoreli. Ja kak tak, a žena malo več. Kaj je i logično. Dete spi h našoj spavačoj sobi. Žena isto tak. A ja h dnevnoj. Pa ne čujem saki put kad se zbudi.

I tak ja jednu noč dojdem h sobu k ženi i detetu. Žene niti spi niti je budna. Nekak je onak između bila. Gracia se obrnula h kinderbetu i gledi čez one rešetke i to na onoj strani gde su joj inače noge. Sednem si na rub kreveta i tak se Gracia i ja gledimo. Kad ona najemput veli: „Ta ta pi mi!“. Ja ne verujem u to kaj sam čul, a žena onak iz polusna se mam razbudila i veli da nek ju onda primim kad mi je tak ljepo rekla. A još nema 10 meseci. Zapraf kad bu of broj na kioskima več bu imela 10 meseci. I ne samo da pripoveda na veliko, nego si več i sama more flašicu držati. Neko jutro donesem ja flašicu s čokolinom i denem joj h ruke. A ona ju obrne i počne vlječi. Sve u svemu Gracia je super, još samo kad bi štela po noči spati.

Neki dan mene Sandra pita da joj pokažem nekaj iz matematike. Bilo je nekaj o djeljivosti brojeva. Kak ja ne volim deci rješavati zadatke, nego ih uputim gde da najdeju kak da rješiju to, tak sam joj rekel da nek pogleda h knjigu. Veli ona meni da ne piše za sve brojeve h knjigi. Mislim si ja kak bi napravili knjigu gde ne objasne, i radnu bilježnicu gde su zadaci koji nisu pojašnjeni h knjigi. I normalno da ima toga. H knjigi je objašnjena djeljivost brojeva s 2, 3, 5, 9 i 10. A u radnoj bilježnici (ili je to vježbenica ili zbirka zadataka) je bil zadatak gde je trebala djeljivost s 4.

Kak se tu i tam i ja zdignem po noči kad se dete zbudi moram to negde nadoknaditi. Najbolje za to je cug kad idem na posel. S obzirom na brzine cuga stignem ja dosta prespati. Jedino neznam kak bum spal kad buju počeli voziti superbrzi cugi čez Zagorje. Teri bu do Zagreba došel za recimo pol vure. U odnosu na sadašnje stanje brzine od 100 na sat su supersonične. Samo kaj mi se nekak vidi da če su buju ikad tak brzo cugi peljali čez Zagorje ja h njima nem spal jer bum valjda h penziji, ili bum do tad več hmrl. A kak je krenulo morti za par ljet opče željeznice niti nebu.

Kad pogledam čez okno van prvo kaj vidim su susedina jabuka i ZIVT-ov dimnjak. I jedno i drugo samo kaj se ne zruši. Imela je suseda dvije takve jabuke. Jedna se zrušila sama od sebe, a druga se još neda. Još da su to nekakve fine jabuke, pa da tu i tam poberem teru… A dimnjak bu se taki zrušil če nastaviju metati koječega po njemu s ovim tempom kojim se po njemu meče. Počelo je s dvije-tri antene. Denes ih je 20, plus ona nova reklama