Zima je cajt gda od vajkada ljudi i deca dobiju sakojačke betege. Te je bilje nekak normalne, pogotove prie. Ljudi su bilji fiže kre peči, grelji se i gda su zišlji van na mrzlje, malje jih je prešel mrzlji pah i mam su obetežalji. Deca pak na pol gola biejžala su z hiže van na igranje i oni su takaj obetežalji. Kak je bilje malje doktorof ilji su bilji deljejke, betegi su se ljiečilji z domačemi vračstvami. Če one niesu pomogle, bormeč se sklepetalje. Tak su unda grobljiča bila puna i malje grobeke.

Niese ni denes pune več zmenilje. I hu ovem cajtu dosta ljudi i dece postane betegljive. Ipak je sreča kaj su zmisljilji sakojačka nova vračstva tera, veljiju kak ljiečiju neke, a druge hbijaju. Zmisljilje su se i nekteri drugi betegi, z teremi se ljudi boriju. Kak su moderni betegi, moderna je i medicina i vračsve, a na negdašnje se nigdar ilji rietke gda zmislji. Na nje se zmislji unda gda več druge, moderne ne pomore.

Denes ljudi gda jih kaj zabolji prejdeju h štacun z vračstvem i nakupujeju kaj česa, e bu pomoglje ilji ne. Na starinska domača vračstva se odavne več pozabilje. Domače vračstve su ljudi pririhtavalji čez cielje ljete. Sušilji sakojačke trave, čajeke, sadje i spravljalji jih h male platnene culce tere bi obesilji negde pod strehu na najže ilji h komoru. Takve vračstve je moralje biti na suhem kaj nej pofajtnelje, a unda bi popljesnivelje i tak nej bilje dobre.

Gda su počelji cajti betega ilji kak denes ljudi veljiju gripozne vrieme, ščem je počelje šmrcanje, mam se krenulje z ljiečenjem. Ljudi su hunjavicu ljiečilji tak kaj se skuhalje tierje. Za one teri neznaju tierje je bila sitna krma puna sakojačke posušene poljske cveteke. Gda se je tierje dobre prekipelje, betežni bi se nagnul na kipuči lonček z teruga se parilje. Glava bi mu se prekrila z nekakvu krpu i on bi dihal toplu paru. Za čas bi mu se odštopal nos i bilje bi mu bolje. Ak su ga pri tomu boljele i vuhe hu nje se nakapalje par kapljic zgretuga voljiča.

Kak je unda pri hiže rietke bilje penez za kupiček i voljiča ljudi su na krove imelji zasajeni čuvar hiže ilji natres. Za boleče vuhe stisnulji su se njegvi ljisteki z tere su kapale kapljice biljnuga soka. Od prehlade se je i brohnjalje. Ljudi su pilji čajek od plučnjaka ilji se prepeklje malje cukareka na pojme. Na restaljeni cukar delje se malje mljika i kap masti ilji voljiča kaj se je kašelj bolje trgal. Z betegem su ljudi znalji i kuriti. Od vručine se znalje bluditi. Drhtavica je znala biti tak veljika kaj se je čovek tresel kaj hiljade vrapce. Vručina je splahla tak kaj se metal friški krafski sirek h šake i na tabane. Če nej te pomoglje unda se po prsa mazalje z guskinu mašču. Guskina mast se dobila tak kaj se je z guskine črievi pobrala i zacvrla. Takvu je mast imiela saka hiža jer se ž nju ljiečilje sakojački beteg po kože. Z guskinu mašču mazale su se skule ilji kakve drape, otekljine po tielu i unda bi mam  splahle.

Slabe obljiečeni ljudi su si znalji prehladiti mehur. Njega se ljiečilje z banjanjem. Skukal bi se lonec tierja, hljejal h kantu na teru bi se selje z golu ritju. Sedelje bi se tak se dok se nej voda z skuhanem tierjem resladila. Za betežni mehur i za bolje spanje kuhal se čaj od koprive. Bol h želucu  ljiečila se z kuhanem sadjem ilji čajeki. Od vrljike vručine i betega  h čoveku se štelje zaštopati blate. Kaj bi lježe išel na stran kuhale su se suhe sljive ilji hruške. Ak nej bilje toga pri hiže unda se h kropnu vodu diela gamiljica. Nie se smiela prekipeti. Poklje toga, kaj bi spil takev ljehki čaj od gamiljice mam se je čovek odštopal. Če je pak ž njega brizgalje kaj z race, unda se skuhal čajek od dunjinoga perja ilji se gamiljica fejst prekipela.

Kaj nej ljudi obetežalje jelji su pune kisiluga zelja i pilji rasol. Stariejši su kosalji bielji lukec, a grle su si sake jute splakalji z rakijicu. Pogutnulje se h zimsku dobu i kuhanoga vinčeka. Znalje se reči. a i denes se negde čuje:
„Drš se pipe, nebu kripe!“
Ak pak i ona dojde, gda ne pomoreju moderna vračstva dobre je potegnuti i za onemi, starinskami. Morti i pomoreju.