Zima stišče, kak i negda. Hu cajtu gda se od vajkada vanje nie moglje nič delati bilje je sakojačke svetke teri su se prinas ovršavalji. Ščem su išlji dukši dani i ljepše vrieme svetkuvanje se preriedilje. Zdej nam prihajaju dva veljiki svetki, Sviečnica i Blažove.

Sviečnica se slavi kak spomen na cajt gda su Josip i Marija doneslji maluga Isusa prvi put h Hram Božji. Bila je te zapoved tera je važila za cajt gda se je rodil Isus. Saka mater poklje kaj rodi diete morala ga je donesti h hram. Tak je poklje četrdeset dane od gda je rodila maluga Isuseka, Marija donesla detece h Hram Božji. Tuj se je našel starec Šimun i proročica Ana. Starec Šimun je rekle da je z maljem Isusem došle svetlje h Hram Božji. Svetlje tere bu posvietljilje življenje ljudi tere je bilje, i još je h griehu. To je svetlje h srcu osietil Šimun i Ana. Znalji su da je z tu svjetlošču došel on gdoj bu spasil Sviet. Marija, mati Isusova je ona koja h ruka drži svetlje pak se i ona svetkuje kak uljarica tera drži luč. Radi spomena na tie dan, po cirkava se blagoslavljaju svečice. Negda nie bilje hiže tera nie imiela blagoslovljenu svečicu. Gda se je dima donesla blagoslovljena svečica od meše, skupilji su se hižni, a ona se je hvužgala. Poklje kaj se je zmoljilje pri goreče svečice, najstareši muški teri je fiže živel, sakomu hižnomu spuknul je jeden las z glave i kuril ga na svieče. Dobre se lukalje kam je išel dim od gorečuga lasa jer takva je sudbina čakala sakuga hižnuga. Če je dim išel prema postelje bil je te znak da bu čez ljete betežni. Ak je išel dim prema stolu tie bu čez ljete vesel i zdraf. Če je pak dim išel prema vrati bilje je te dobre ak je bil od puce. Unda je te bil znak da bu išla od hiže, za muža. Nu če je pak dim od zgoretuga lasa od stariešuga išel prema vrati bil je te znak da bi mogel to ljete prejti na grobiče. Bilje kak bilje dok su se lasi kurilji, si su bilji tihe i čakalji kaj se bu pripetilje. Poklje toga se svečica diela na meste gde ju je saki cajt mogel nejti saki hižni. Gda bi nešče hmiral bez blagoslovljene svečice h ruka, bil je te veljiki grieh za sakuga hižnuga teri mu ju nebi dal. Plamen svečice h življenju ljudi je svetlost tera bi sakomu čoveku trebala svietljiti životne putece. Radi toga se pri gorete svečice krstime, imame goreču svieču h ruka gda se prvi put pričieščame. Svečica gori gda se firmame i ženime.

One kaj je morti denes žalosne je da več retke gdoj ide na onie sviet z goreču sveču h ruka. Malje gdoj ima sreču da se doma h svoje hiže i med familjuju „oprašča“pri goreče svečice tera bi svietljila putec duše, kam god da krene. Da je Sviečnica negda bil fejst preštimavani svetek znalje se kaj su tie dan ilji par dane prie po selu hodile pucice i po hiža popievale. Na stol bi dele kip Majčice Božje i zapopievale:
..“Majko Božje Sviečnica,
budi naša pomočnica.
Ti nam budeš svieču žgala
sudnji ljist h ruke dala....“

Drugi svetek Blaževe takaj se več po hiža retke svetkuje. Blaž je bil svetec teruga su preganjalji radi vere. Ne same da je veruval h Isusa nek je znal delati i sakojačke dobre posle. Bil je dober z siromaki i rade je sem pomagal. Pajdašuval je i z zvieri tere mu niesu nič štel. Gda je gdoj bil betežen došel je k njemu i on biga zljiečil. Jemput je snel riblju kost z grla. Radi toga ga se poštiva kak zaštitnika grla. Na Blažove se ide k meše z jabuku. H cirkve se pod grlje mečeju dvie svečice h križ. Svečenik blagoslavlja ljudem grle kaj nej bilji betežni. Pri kraju meše blagosloviju se jabuke tere ljudi neseju dima. Doma se jabuka zrieže na tuljike šnitic kuljike je hižne. Saki si pojie jeden komačec blagoslovljene jabuke tera ga čez ljete čuva od betega grla.
Baš si ovak gruntam kak bi bilje ljiepe da hnogi denes pojieju bar jedn komačec jabučice. Morti nej z njihovih grla moglje zajti tuljike grde i lažljive rieči. A morti bi se unda i mogla videti svetlost svečice tera bi počela poklje duge cajta svietiti po putece po tera hodiju ljudi.