Prethodna kolumna
Slijedeća kolumna

Za dušu za spomenek: RAJENJE, ČESTITKA POLOŽARE

Piše: Nevenka Gregurić
Flajem Isus i Marija!
Na tom Mladom ljetu
tusti debeli
zdravi veseli.
Daj vam Bog
guščiče,

Flajem Isus i Marija!
Na tom Mladom ljetu
tusti debeli
zdravi veseli.
Daj vam Bog
guščiče, račiče,
puriče, fačiče,
pune lagve vina,
pune škrinje žita
i da bi vam kvočke
trde na jajci sedele.
Daj vam Bog
sega obilja,
a naj več
Božjuga mira i blagoslova!


Znam da oni teri čitaju naš ljist znaju da je i h prijašnja ljieta položarove čestitka več bila napisana. Nek je i naj bu. I položari teri su negda hodilji po selu, hodilji su sake ljete rane hjutre i pred saku hižu zrajilji dobre poznate želje. Položari, dejčešinci h sela, hganjalji su se teri se bu raneše zdigel i prie obišel hiže, zrajil i za svoje rajenje dobil kakve krajcere ilji dinare. Gizdavi su bilji hižni pred čievemi se vrati več put čul položar. Položari su rade hodilji same kre dobre ljudie, jer su znalji da nejdu zabadave. Hiže h tera niesu bilji dobredošlji rejše su preskakalji. Negda, ni zima, ni cieljec snieg ni bolonduvanje ciele noči niesu moglji zabremzati decu kaj nej išlji za položare.

Nema denes položare. Nema ni rajenja pred vrati. Morti je radi toga po hiža denes se nekak zbrčkane i obrnjene na hopak? Morti se i zate na ljica ljudie se menje more videti radost, a z srca se menje čuje smieh. Kak da je se te nekam prešle z položeri, z Novoljetnami pesmami kaj su pajdaši pajdašem znalji zapopievati i zaigrati pod oknem. Pozabile su se takaj hnoge stare šege do tere se negda držalje. Jedna od njih je i veselje cielji dan Novuga ljeta. Če si na Nove ljete vesel cielji dan, čaka te vesele ljete. Svaje fiže med hižnemi nikak nie smelje biti jer bi se unda svadilji furt med sobu. Na stolu je moralje biti svinjske mese, a ne nikak živače. Živinče gda zgrieblje zemlju z nogami, rieva ju otraga, pa tak bi i gospodara mogla krenuti na rikverc. Svinče pak zemlju ruje napre, i če se jie mese od pajceka, gospodara bi krenula napre. Na Nove ljete nie baš bilje dobre da babe hodiju po sele h čestitare, kaj nej donesle k hiže kakvu kaštigu.

Bilje po stara šega ilji po nova nejveča je sreča gda čovek more, onak od srca i poštenja, sakomu do dotekne njegef životni putec zaželjeti sreču, zdravlje i veselje. Veljiju da bu teške, alji mi sme več nafčeni na žmehkoču i žmikanje pak zate nie nič novuga. Čuvajte se same lažnih lafri tere vam se h gubec nasmejavaju, trepljeju vas po pleča, a histe vrieme rievaju nože. Nu, ne morate se plašiti če vam se kaj takvuga pripeti. Navieke važiju i one starinske:
„Gdoj pod kem jamu kopa, sam hu nju opadne.“ A tuj je i ona :“Pravda je spora, alji gda dojde,dojde z kamatami!“ Radi toga se unda, kak i ja, najte brigivati.

VESELJITE SE UNDA CAJTEM TERI PRIHAJAJU I SREČNE VAM NOVE LJETE!

Facebook