Več put h spomenku gda pripoviedam o prešlje cajte znam čujti nektere mlajše kak nekak z sprdavanjem veljiju da su ljudi negda bilji zaostalji. Nu, ne gruntaju same mlaši o prošle cajte tak, nek na veljiku žalost i onie teri su hu te davne cajte živelji. Gda jih čovek luče, siguren je kak bi najrajše na te cajte pozabilji. A ak se več i nemre pozabiti da se barem na nje preveč ne zmišljava i ne sramoti.

Ipak, ti zaostalji i prešlji cajti imelji su one kaj h denešnje cajte več teške moraš najti. Kak god da su cajti bilji grdi, sirotinjski, kmični, žmehki i sfrčkani ljudi niesu pozabilji da imaju dušu. Ljepotu i topljinu svoje duše znalji su pokazati pajdašu, kumu, rođaku, a i morti slučajnomu putniku h bogatstvu i siromaštvu. H veseljice i h žalosti če njim i čovek nie bil kak bi negda reklji ljudi: „kak Bog zapovieda“, znalje se kaj je red i kak se je morati ponašati. Najvažnejši i najveseljijieši cajt h življenju čoveka je gda se narodi i započne svoje življenje. Najžalosnieši pak cajt je cajt gda čoveku, po mojem, dogori svieča življenja i mora krenuti na put z teruga se ne vrača. I baš gda se pri hiže dogodi takef jeden grdi cajt gda je čovek pozvan na put prema večnosti, ljudi su negda priskakalji na pomoč familjije. Ljudi su se med sobu negda koškalji, svadilji, čak negda završilji pri sudu, alji gda se je bljižil konnec kraju na se se pozabilje. Če se i ljudi niesu stiglji oprostiti od pokojnika, a bilji su h nekakve svaje, znalji su reči: „nek mu Bog oprosti griehe, a ja mu ih opraščam.“

Gda je bil pokonjik h selu na skolka hu tomu se selu nič nie smelje teškuga delati. Največa grehota bi bila gda bi nešče nekaj prčkal po zemlje, oral ilji kopal. Znalje se reči:
„Dok je mrtviec h selu, h zemlje se ne rova.“

Sprevod je negda išel od doma, a mrtviec je bil doma bar dvie noči, tak je cielje selje bilje h tišine kaj bi se dal mir pokonje duše. Kak god da je gdoj negda bil lakoten ilji zločest toga se reda navieke držal. H selu gde je bil mrtviec od sake su hiže išlji na sprevod si teri su moglji iti, a od susednih sela barem nešče od hiže. Iti nekomu na sprevod, značilje je prve da držiš neke do sebe kak čoveka, da poštivaš familjiju pokonjika i da se moliš za pokonjikovu dušu.

Pune se toga od takve šegi zmenilje, alji one kaj je ostalje iste je da pravi pajdaši držiju do onie teri su bilji diel njihovoga življenja i njihove familije, se dok jedni i drugi poživiju.

Došle su nove šege, od tere pokonjikovu familjuju zabolji glava od velikoga larmanja i zakljinjanja da se nigdar ne na pokonjika pozabilje. I baš tie teri najbolje larmaju i kuneju se h večne pamčenje, pozabilju te več pri prve bertije. Ipak, one kaj je još tužniejše je gda čoveka na večni put nema gdoj popratiti. Ne da nema gdoj, nek su si oni z teremi je čez življenje deljil i dobre i zlo zgubilji nekaj kaj su morti negda imelji. Morti bi bilje dobre da se nekteri, polukneju h špigelj i popitaju: „pak kaj sem i gde zgubil dušu?“

I hnogi se bi moralji pitati poklje toga kaj je jedna medicinska sestra, jedna Marija, završila svoj radni i životni viek na Obračaku i prešla bez pozdrava, bez cveteka, bez ijedne rieči, skore sama h drvenem sanduku. A Mariju, odrešitu sestru, z sfrčkanu punđu na glave nišče gdoj je iskal pomoč na Obračaku nie mogel, a da ju nej videl. Bila je govorljiva baba, do zajdnjega verna svojem slavonskom govoru i svoje Slavonije. Došla je h Zagorje, h nepoznati kraj sredinom prošluga vieka, zavoljela posel i ljude i ostala do zadnjuga dana svojuga življenja. Nie imela svojuga pokoljenja pak je svoje življenje daruvala još več poslu. Došla je z veseljem, a prešla bi sama h drvenem sanduku da ju nie otpradila Seka, tera ju nie mogla „pustiti“ samu. A Seka je bila same jedna prolazna točka h Marijinem življenju, gde si je poklje teškuga posla Marija mogla počinuti dušu i tielje.

Žalosne je i tužne, da poklje več od četrdeset ljiet kaj je nosila kutu medicinske sestre, kaj je hnogem pokazala kak buju zapičilji prvu inekciju, kak buju nekomu olakšalji bol, kak se treba nositi i glodati koru toga teškuga poziva ipak nie ostavila traga h njihovem pamčenju. Ilji su te denešnje ljudi tuljike pokvarilji cajti da su zgubilji dušu.