Prethodna kolumna
Slijedeća kolumna

Za dušu, za spomenek: Ljestina

Piše: Nevenka Gregurić
Gda sem se ja z svoju familji doseljila h svoju hiži, oko nje je bila pustoš. Bez plota, bez dri


Gda sem se ja z svoju familji doseljila h svoju hiži, oko nje je bila pustoš. Bez plota, bez drievlja zgledala je kaj hiža na pusteseljine. Da nej bilje tak, moj Branek je ze se kraje zasadil drievlje. Kak je rekel, z ljieve strani prema hiže sadje, a z desne strani, za dušu, drievlje za park. Hu tem parku bilje je zasajene sakojačkuga driva, a med njim, još denes rastuče dvie breze, za saku pucku jedna. Trejte pucke još nie bilje pak se kesniejše reklje, kaj se nej srdila, da je unda se druge drivlje njenje. Od sadja bilje je tuj zasejene sega, od najraniejše čriešenj, do najkesniejše jabuk i hrušek.

Življenje i cajti bežiju. Deca se reshitala po svietu, Branek več nie med živemi, a i nektere drievlje je ostarnelje i obsehlje. Senek još je ostalje dosta drievlja i rasljinja tera cinfraju i smradiju dvorišče. Najgorši smradeci h dvorišča su breze. Smradiju od gda se rescvieteju z nekakvem pahuljinjičem, pak z šmrklji, pak unda nekaj ž njih leti kaj sitni malji bramasti ljeptireki i če dobre ne pazoš moreju ti vujti h saki diel hiže. Negda se na nje tak resrdim da bi zela pilu i mam jih odcmeknula. Huda jesem na nje, alji gda bi te napravila bilje bi te glji ravne kaj da sem si ociekla komaček duše. Ipak, sake drievlje h dvorišču daje največ brigu h jesen, gda mienja opravilje. Listje sakojačke felje i farbe najprie cinfra svoje stablje, a unda se poljehku spusti na zemlju i napravi ljiepi šari „tepih“.

Njega trieba skore saki dan sfrkati h maržu ilji vreču i odnesti, na za te, odrejene meste. I taman gda misliš da si gotof z frkanjem tepiha, ne obrneš se dvati put več je resprsteti novi. Tak dvorišče mienjaju veljičinu i šarinu tepiha skore dva mesece, dok pahulje snjega ne skrijeju onuga teri je ostal. I čovek bi bil hud, na tie posel, na te frkanje tepiha od ljestine, da mu na nieki način nie drage kaj se, dok pribira šere ljisteke h maržu ne zmislji na, ne tak davne cajte, gda je ljestina bila prave malje bogatstve gdoj ju je imel. Sporadi ljestine hnogi su se susedi posvadilji, a hnoge babe pokarale. Mladem je te denes čudne i smiešne, jer neznaju da gdoj je imel blage i svinje bez ljestine je bil pravi bogec. Bez ljestine nie bilje štraje za živinu. Kak su štale i kočaki bilji restelesani bez štrajenja bi se h jake zima živina pomrzla.

Bilje je ljudi teri niesu imelji svoje huste ilji su njim one bile male pak je bilje i malje ljestine. Za ljestinu se triebalje negda snajti Zubljati ljestinu h jesen h lucke huste bilje je zabranjene, a če bi se nešče prikral i poskrivečki nazubljal koš ljestine srce bi mu od straha tuklje kaj bubenj. Nie se smelje zubljati ljestinu pri nas ni h Kuljmerice, državne huste. Šumar je pazil na ljestinu kak i na drievlje. Bila je te zabrana radi toga kaj se husta sama z ljestinu gnjojila, a iste tak branilje se zubljati kaj se zubačami nej ranierale mlade bukvičke i hrasti. Unda su došlji cajti gda su šumari h Kuljmerice prodavalji plati na tere si mogel ljestinu nazubljati, a za te si trebal platiti. Baš se zmisljim kak su šumari bilji „prosti“ prema babam tere su zubljale ljestinu. Te je za unda i denes bilje pre grde. Baš si tak gruntam e se gda zmisliju, onie teri su živi, kak je grde kaj su radi ljestine delalji zloče.

Mene je dedek saku jesen napravil prutni košek od vrbove šibi. Ž njim sem skup z materju, a negda i sama hodila po ljestinu. Mi sme hodilji h dedekovu hustu, a ljestine nie bilje dosta ni za njuga. Mati je ostavila koš h dedekove huste, a ja sem prešla h lucku zubljati i nemietati svoj košek. Unda sem ga donesla do matere tera je z dedekove huste pazila da nej gdoj išel. Ona je unda preklala z mojuga košeka ljestinu h svoj i tak sme delele dok i njenji i moj košek nej bil puni.Če bi mene i gdoj i h jesen hlovil h svoje huste nej me špotal radi toga kaj sem bila mala. Malje bi me oštreše opomenul i na tomu bi završilje. Ak je bil ljestinjak i još diel štale pun ljestine nie bilje straha da se bu kravica i pajca zmrzavala gda je zapuhal severec. Kak god da me baš nigdar nišče nie fejst našpotal radi ljestine teru sam h nečove huste nazubljala, senek dok sem zubačke po huste povlačila i dielala kupčeke ljestine tere bi unda rievala i gnjela h košek, srčeke je drhtalje kak zajcu.

I unda, zate gda mi ljestina smradi dvorišče nemrem biti na nju huda. Imeti nju h ljestinjaku, ne tak davne, značilje je da je štala puna blaga, a kočaki živine i svinje. A te je pak unda bilje prave bogatstve i veselje.

Facebook