Baš sme imelji za čujti ove dane podatke kuljike nas živi h Ljiepe naše. Popisalji sme se h duž i poprek i gda se se zbrojilje, ljudem se povedalje kak nas je pune menje nek nas je bilje prie deset ljiet. A gda si čovek malje bolje pregrunta nie baš te niti tak menje ljudstva, gda se te mieri z veljičinu jednuga veljikuga grada. Kak god da su podatki grdi pokazalji su da nas je se menje i menje. Da nas je menje sakomu je jasne, same ne oniem teri nam furt kažeju mesec h vode i tvdiju da nas je tuljike kuljike i prie deset ljiet, same da niesu si popisani jer su prešlji van Ljiepe naše po sakojačke poslije. Sakomu gdoj ima nekuga vanje, svojiga z familjije, a tuj morem svedočiti i ja, dal ga je zapisati tak da se je i on zbrojil k tomu kuljike nas je.

More biti da onie teri misljiju da nas je iste kak prie deset i več ljiet imaju svoje popise. Na nje su sigurne onie teri su več odavne prešlji z naše kraje i več sami, a kam ne njihova deca pozabilji reči :
„Dobar dan!“

Ak na te računame i imame jih na spisku gda nam trebaju, a dobre se zna, gda i za kaj, unda nas mortič i je tuljike kuljike i prie, a more biti i več.

Sakomu teri pak živi h ove Ljiepe naše več je odavne bistre da su cajti kakvi su bilji prie, kaj se rađanje dece dotikavlje deljehke za nami. Z toga cajta ima i onie stari vic teruga sem vam več morti i negda spripoviedala, alji dobre se i na njega zmisljiti.
Bil je tak iste h jednem cajtu življenja popis sega i sačega. Hu tem cajtu nie se hodilje po sela popisavati nek je saki gazda išel na kotar popisati svoju familjiju i se kaj je imel.

Tak je došel Štief, popisati svoju siročinju i gda ga je pisar spitaval kaj se ima, počel je nabrajati. Nabrojil je onak žalosne da ima malu bajticu i štaljicu, staru kravicu i par kokoš. Unda je malje zastal kak da ga je sram i rekel:
„Znate gospon pisar, ja vam još imam dece, deset.“
Pisar je snel nočalji, pogledal h Štiefa i nie mogel veruvati kaj mu je rekel.
„Štief. Pak vi mene zafrkavate. Vi da imate DC10?“
Još bolje srameče, Štief je pogledal h pod i još bolj srameče rekel:
„Je gospon pisar. Imam dece deset.“

Malje nervozen pisar lukal je Štiefa i gruntal si da tie malji čovek diela ž njega bedaka. Hude je nabral obrve i pital ga onak strogoči.
„Tak Štief. Ti veliš da imaš DC10? Dobre i da ti te poverujem, alji gde ti je unda pista za sljietanje?“
Štief je ves počrljenel od srama i postihuga rekel.
„Je gospon pisar. Pista za sljietanje je moje Micike med nogami!“

Unda je tak pisaru postalje jasne da se diela o deset komade dece tere je Štief imel, a ne o eroplanu DC10, na tere je on misljil. „Štiefi“, a i „Mice“ denes gruntaju drugač. Več jih je teške navabiti da se oženiju, a kamolji da imaju več dece. Kuljike god mi štelji i srdilji se na nje, trieba jih razmeti. Imeti denes jeduga ilji več panjkrate je kaj da si si del „štrik za vrat“. Da bi ga same obljiekel i nahranil dok dojde na sviet trieba imeti pun pobelar penez. Za peneze tere potrošiš za jedne deteče šlape, moreš kupiti barem jedne ilji dvoje za odrasloga čoveka. A kak su grdi cajti teške si je denes kaj i privuščiti. Če se bu tak išlje i dalje za popisati za jedne pedeset ljiet teške se bu več i najti ljudi. Radi toga bi triebalji gruntati oni teremi je te posel. Nebi triebalji misljiti same na sebe, svoje panjkrate i familjiju nek i na Ljiepu našu i ljudi teri hu nje živiju. Zabadave bu državae, ak hu nje ne ljudi.

Kak god denes obrnulji, istina je sakomu pametnomu bistra da nas je saki dan se menje kuljike god da te nekteri očeju skriti. Sakomu je takaj jasne da je več onie mesta h terem se več hmira nek rodi. Če se ne mladem dalje da služiju peneze neju ni imelji opčem delati decu i nas več je, a i bu, se menje i menje. Tak unda dobre zname da nas nie več, niti iste nek se menje i menje, makar onie teri furt kažeju mesec h vode lažeju sami sebe, a unda tak misljiju i nas.