Sad je vreme da se tajkunima zemeju firme, švercerima penezi, mafije imovina, pa bu dosta i za darove i za doktore

Nekak mi se čini da veliki broj onih koji bi trebali biti stručni i razmeti kaj se na ekonomskom planu v svetu događa, zapraf, o tom nemaju poima. Kojekakvi analitičari laprdaju o ekonomije, prisvajaju si ekskluzivitet na znanje i tumačenje, a saki novi dan ih demantira vu tom kaj su i kak predviđali.

Još je gorše kad i oni koji bi trebali donositi nekakve mere protiv posljedica krize, ne same da lupljeju bez veze, nek se poklje moraju ispravljati i opravdavati. Zadnja najava precednika Vlade bila je da se z državne kase neju isplačivali darovi za Božić. Ali nakon par dane kad je videl da je bubnul glupost počel se opravdavati i sad kao nije mislil na božičnice, nek na darove i zabave koje firme prirediju za poslovne partnere. Odlična mera! Na taj način bume efikasne sprečili da financiska kriza ne pogodi Hrvacku! Trebame se same odreči poslovnih fešti i poklone! Viš vraga, ko bi rekel da je to takva ključna stvar! Iste tak je glupost ne povečavati plače. Ak nešči more bu povečal plaču, ak nemre ne bu, ali od večih plač država več i dobija. A za to kaj je na nekim mestima v državne službe višak ljudi nisu krivi oni koji svojim radom zaslužiju veču plaču.

Druga glupost je reforma zdravstva. Tu, po mene, nisu u pravu ni vlast koja reformu oče provesti, niti oporba koja je protiv sega, ali nema rešenje za nič. Sadašnjega ministra Milinoviča imel sam priliku jemput upoznati dok još nije bil tak visoke pozicioniran i činil mi se v razgovoru ko dosta razumen i normalen čovek, zapraf, nije se pokazal ko tipični bahati HDZtovac. Moguče da je takev i ostal, ali siromak ni sam ne zna objasniti kaj i kak to misli napraviti.

Jasne nam je da v zdravstvu fali penez, jer zdravstvene službe nemreju funkcionirati bez love, ali to treba jasne reči: Ljudi, fali nam x milione penez. Ak se očete lječiti to treba platiti! Ali si moraju biti svesni da one male ljudi kaj dela po firma koje nekaj proizvodiju, nemre na svoji pleča nositi teret celoga društva.

Saka čast onima koji su prešli v starosnu penziju, ili zbog bolesti više nisu mogli delati, ali bojim se da se uz njih šlepa i veliki broj onih koji su penziju ili kupili ili dobili prek veze. Mene čeka još 22 leta za oddelati, ak bum penziju doživel, a imam vršnjake koji su v penzije već deset let, doma kopaju, betoniraju i piliju bez obzira na invaliditet. Invalidi su bili jedine pred komisiju!

Zemime npr. branitelje. Ima ljudi koji su teške situacije prešli, ranjavani i zaslužili su da ih država zbrine. Ali kaj delaju v penzije oni koji su ratovali po kancelarija? Si ti ljudi koji nemaju pravi razlog za to kaj su penzionirani teret su za prave penzionere, ali pravi teret su za one koji delaju!

Ili policija. Govori se da imame veliki broj službenika, ali male onih na terenu! Pune ljudi, a male radnike!

Navodne je Sanader prije kraja prošloga mandata v državnu službu zaposlil oko 6000 ljudi! Navodne i 2500 vanjskih suradnike da napraviju one za kaj ovi zaposleni nisu sposobni. Saki zapošljava svoje, a nišči ne pita one koji to plačaju da li hočeju i moreju to zdržati!

Si bi mi mukte do kakve penzije ili plače, ali doj bu za nas delal? Saki koji na teret države oče sebe srediti nekaj kaj ga nejde seda na grbaču onoga koji dela!
Pa nek Sanader razmisli de treba zagrabiti. Zakaj ne zeme onima kojima su njegovi kompiči zdavali se kaj je v ove države vredile?

Trošek krize trebaju podnesti oni koji su se na račun države obogateli, a ne oni koji su ostali bez ičega!