I službeno je počelo ljeto. To je godišnje doba tero ljudi obično imaju rad. Velika večina ide po ljetu na godišnji. Obično gdo god more ide na more. Pa čak i oni teri su po zimi išli na skijanje. Skoro svoj deci je ljeto također omiljeno godišnje doba. Pogotovo zato jer nema škole.

Ja ljeto ne volim. Prvo kaj mi je vruče. Po zimi ak mi je zima malo bolje se oblječem i nije mi zima. A po ljetu kak god da se slječem vruče mi je. I puno je več posla po ljetu. Po zimi tu i tam počistim snjeg i gotovo. A po ljetu posla kolko hočeš.

Prvo na poslu. Sezona je godišnjih. Pa nas malo fali. Jer nas je na knap kad smo svi na poslu. Čak i kad svi delamo moramo tu i tam oddelati teru prekovremenu vuru. A sad kad je furt nešči na godišnjem treba delati još i več. Čak nam i neke te prekovremene vure i platiju, ali nam i nudiju da si za te prekovremene vure zememo slobodne dane. I ak si neščo zeme slobodne dane, onda ga pak nema i fali na poslu i nešči drugi mora delati prekovremeno. I tak u krug.

A i doma je več posla. Sako malo treba oko hiže travu pokositi. Samo kaj sad več ne kosim samo travu kaj mi raste po dvorišču, nego moram i travu kaj po cesti raste riješiti. Sad si mislite gde to ja živim kaj imam trave po cesti. H centru Zaboka. I h mojoj ulici je negda bilo asfalta. Sad je još ostal u tragovima. I sad več po sred ceste raste trava.

Posla je i h vrtu i h trsju. Naročito kad je ovakvo vrijeme. Prvo kiša, pa jako sunce. Pa onda treba trsje flaksati, pa ga treba i pošpricati, a i vrijeme štucanja dolazi. H vrtu bolje raste drač nego ono kaj smo posadili i posijali. Čak sam i ženi pomogel drač pljeti. Pa me natirala nakoliti bažulj i grašak. Bažulj nije problem nakoliti. Zemeš kol, če treba malo ga pošpičiš i zapičiš h zemlju. Ali me nerviraju one grančice za grašak. Več sam došel na ideju da mu napravim lojtrice ko za rože. Da ne moram sako ljeto z nova rezati grane. Moj omiljeni paradajz ljepo raste i več sam ga dva put moral privezati. Čini mi se da bum moral i veče kolce zapičiti jer paradajz raste ko blesav.

Kak sam i napisal prije deca uživaju. Patricija i Sandra su na praznikima i jedva da ih moreš van iz sobe dobiti. Posebno Patriciju. Njih dvje zasedneju ili zalegneju ispred laptopa i bauljaju po internetu ili glediju nekakve serije onlajn (piši: online). Najbolje mi je kad se počneju dopisivati, a h istoj sobi su.

Ne razmem kak niti jedne godine nemrem najti pumpu za bazen napuhnuti. Onda iskoristim svoja pluča za to. Tak sam i neki dan napravil. Uz pomoč svojih organa sam napuhnul bazen, a Patricija i Sandra su ga napunile z vodom. A u njemu je uživala Gracia. Tak vam to je u životu. Nešči dela, a nešči drugi uživa.