Posel mi je takev da se dosta vozim i nije mi sejedno kak se ljudi ponašaju u prometu. Kolike god ja pazil kak se vozim, nigdar se ne zna kakva budala more naiti z druge strane. Moram priznati da ima sega i nije čudno kaj se tolike nesreće događaju. Ne znam same kaj ljude tira da tak voziju. Ni ja se često ne pridržavam propisa, ali ni ne srljam nekam na pamet.

Dosta put v jutro prije šest vur idem za Zagreb po staroj magistrali. Neki se vlječeju po cesti, a nekima se jake žuri. Ni ja se ne vozim pomalu, ali ne razmem idiota koji pretiče v nepreglednom zavoju. To ne da nema veze z vožnju, nego nema veze s pameću. Pune put sam bil svedok kad je dlaka falela da se ne dogodi frontalni sudar. A zakaj? Komu se to tak more žureti da riskira vlastiti i tuđe živote? I kak tomu stati na kraj? Kazna za prebrzu vožnju takvomu idiotu ne znači nič jer je i po starom zakonu trebal biti kažnjen i to pošteno.

Našoj policiji nije stalo da kazni takve luđake, nego linijom manjeg otpora čekaju tam gde znaju da se ljudi voziju brže bez obzira da li koga ugrožavaju ili ne. Nakon kaj sam celu noč poslušal kak razuzdani šoferčići, terima su očevi dali aute divljaju, zaustavi me policija na Industrijskoj cesti v Zaboku v nedelju h jutro kad nema žive duše. Veliju mi, «gospodine, pogledajte koliko ste vozili». Ja pogledam i vidim 63 km/h. Pitam policajce kaj sam zbilja ugrožaval sigurnost? 60 na Industrijskoj nije nič. To kaj je propisano 50 je čista glupost pod uvjetom da se ljudi voziju pametno. Koliko znam, po Industrijskoj se znaju voziti i duplo i to kad je gust promet.

Kolike put sam videl kak se divljak prepelja po centru Zaboka valjda stotku u vrijeme kad je Zabok pun ljudi i nikomu nič. Nigdar nisam videl da je policija nekoga zaustavila i zbog toga kaznila. Kažnjavaju one kaj su krivo parkirani jer im je tak lježe. Da se mene pita, ja bi toga kaj kroz naselje u sred bijela dana juri kaznil drastično. Ali naše policajce to ne zanima. Njima je bitno da se skupi čim više kazni jer delaju na normu. Zato zaustavljaju najčešče tam gde najmanje trebaju, a tam gde bi trebali biti, tam ih nema.

Morem si misliti kak bu primijenjen novi zakon. To je idealno za policijsku represiju. Jajce buju znesli oni teri su najmenje krivi. Oni pravi krivci opet buju ostali nekažnjeni. Umesto da nadrapaju pijanci, sad buju kažnjeni oni koji buju jeli šalatu i liker bombone. Totalno pijanima ionak je se ravno.

Čitam neki dan v novinama kak je mulec zgazil mati i dvoje dece. Navodno je tri dana prije toga divljal po mestu, ali ga nišči nije diral. Policija je valjda imela prioritet kazniti one za krivo parkiranje.

Da je stari zakon bil primjenjivan kak treba, isto bi dal rezultate. Nije bitno da se čim više ljudi kazni nego da se kazniju oni koji se ponašaju kritično. Najprije treba srediti najgore slučajeve.

Nikakev zakon ne bu riješil prometne probleme ak bu njegova svrha kažnjavanje sitnih prekršaja da bi se popunila državna blagajna. Umesto da se represijom ide na sitne prekršaje, trebalo bi postrožiti one teške. Na primer, preticanje v nepreglednom zavoju po punoj crti - tri meseca zatvora bez pardona! Jurnjava po naseljenom mestu usred bijela dana - automatski gubitak vozačke na šest meseci! Ali to treba provesti. A ne da policija, po noći kad nema nikoga, čeka v grmlju tam de nema ni jedne hiže. Dok god bu svrha zakona naplata, a ne preventiva, sigurnost niš se ne bu postiglo.

Zakaj se moramo voziti za Zagreb po staroj magistrali kad imame novu? Zato jer cestarina za 17 km od Zaboka do Zaprešića košta 10 kuna! Od Zagreba do Kutine za 80 km plaćate 20 kuna! Ja garantiram da bi se smanjenjem cestarine povečal promet na autocesti i smanjil na staroj zagorskoj š čim bi se bitno smanjil i rizik.

Ali s tim se naša vlast neće opterećivati. Oni imaju skupe aute i vlastite šofere. Bitno im je jedino da nagrneju dosta penez da to moreju platiti.