Svetki su za nami. Božič, Nove ljete i Tri kralja brze su prešlji. Hnogi su prešlji ove dane od doma. Za nadati se je da su pajdaši i za nje nabavilji svete vodice. Po svetu vodicu se išlje dan prie Blagojavljanja ilji Tre kralje, gda se pri večrnice negda, a i denes blagoslavjlja friška voda.

Bez svete vodice hiža nigdar nesme biti. Šega je te još i den denes i kak god bilji sfrčkani čez življenje ipak morem sigurne reči da je malje tera hiža, denes, bez blagoslovljene vodice. Istina i Bog, zgubil se je on sveti i pobožni način gda se je voda od večrnice donesla dima. Puti se je flašičička h tere se voda čuvala kaj se nej slučanje z ruk ilji z nadra posmeknula i unda se rezbila, a voda rezljejala ilji potepla. Imeti i malu flašičičku za svetu vodu bilje je prave malje bogatstve.

Gda se je voda prinesla z blagoslova i došlje se h dvorišče triebalje je poškropiti ž nju se kaj se našlje h stanju i oko njega. Poškropilje se dvorišče, štalske stanje, blage, vugljiči hiže, ciela hiža i si hižni. Do poškropljenuga z svetu vodu nie mogel ni coper ni vurok. Betežnem se dalje i da si malje gutneju svete vodice, kaj bi lježe podnašalji bolji tere su jih pritiskale.
Radost svetka Blagojavljanja, z svetu vodu poljiepšalji su i dejčeki teri bi h večerku hodilji popievati pesmu:

....“ O sveta Tri kralja
O blažen vam dan
Kad sveti kralj mladi
Bil z neba poslan.....“

Staru pesmu h večerku, pod obločecem, več duge nie čujti. Retke gdoj več škropi dvorišča, vugljiče i hižu z blagoslovljenu vodu. Malje si i ovak gruntam da je denes po hiža morti radi toga furt nekakva halabuka ilji nemir. Kak da je z večine hiž prešla radost i ljubaf tera bi triebala biti. Blaženost, ljubaf, veselje, radost, sreču i smieh morti rajta mirnoča. Morti bi triebalje biti menje halabuke.

Denes zate poljehku oporavljame vuhe od halabuke tera nas je hvražala dug cajt. Kam si se god obrnul, bečalji su sakojački čački. Nasmejani, restancani, svetliječi... Na se načine vljieklji su nas da nekaj kupime kaj bi druge obraduvalji. Čovek je stvoril nove cajte tere si oče pocinfrati z sakejački čački ilji bi reklji moderne, pokloni. Pokloni teri se poklanjaju ilji dobiju, trebalji bi pokazati kuljike nešče nekuga ima rad. Ilji pak kuljike poklone dobi poklonjene tuljike ga drugi imaju radi. Po tomu zgledi da oni teri niesu pune poklanjalji ilji dobilji poklone niesu vriedni. Ipak, istina je pune drukčeša. Pokloni teri su zavladalji svietem očeju skriti one kaj je čovek dobil na dar od Boga. A te je da i on sam more ne poklanjati nek daruvati pune več nek se bleščeči papier more zamotati. Tie dar teri je dobil od Boga je dar da ima rad druge ljudi, da bu dober otec ilji mati svoje dece, dobra čer ilji sin svojem starcem, da bu prema drugem dober, da bu z pajdašem gda bu mu teške i unda gda bu mu ljiepe....

Tie dar nosi hu sebe i more prepoznati da mu nešče onak od srca daruje svoje cajte. Da mu od srca, oči govoriju kuljike mu čez življenje nešče znači. Da bi svoj dar ljubavi, radosti, topljine i dobrote daruval nekomu ne mora biti z halabuku. Daruvane more biti z stiha, alji da podjednak raduje onuga gdoj daruje kak i onuga gdoj dar prijemlje. O tomu nie trieba delati halabuku, jer saka halabuka ne cinfra nek nagrđuje daruvane.

Fala Bogu da su „cajti za daruvanje“ za nami. Nebuju nam z se novin, z se obloke z teremi lučeme h sviet bljesikele sakojačke nacinfrane face tere dajeju poklone, alji za tere se niesu zmučilji i vruči napilji vode, kak naši ljudi veljiju. A gda i lucke poklanjaju, ne lučeju „bokce“ teri poklone dobivaju h oči nek tam kaj bu ju bolje nasljikani. Takvi poklanjaju poklone same jemput h ljetu i te tak da bi cielji sviet mogel videti. Oni pak teri darujeju dare, daruvane od Boga znaju da su cajti za daruvanje navieke. Daruvani bez halabuke. Daruvani smieh žalosnomu, kupičička radosti žejnomu veselja, diel mladosti zrelosti i starosti, rupček za plačne oči..... .