Prethodna kolumna
Slijedeća kolumna

Za dušu, za spomenek: Fašunjek i Pepelnica

Piše: Nevenka Gregurić
Fejst vodim borbu za čuvanje starih šegi, tere su skore pozabljene. Nie su cajti da se denes po

Fejst vodim borbu za čuvanje starih šegi, tere su skore pozabljene. Nie su cajti da se denes po te šegi i živi, alji jih ipak trieba pamtiti i održati. Ipak mi je drage kaj se o nekterem same pripovieda, alji se ne ovršavaju. Takve su šege za Fašunjek i Pepelnicu.

One kaj se denes ne diela je zasmehavanje starem pucam i dečkem. Negda su stare puce bile one tere su prešle dvojset ljiet, a i stari dečki sega par ljiet več. Cajti su se fejst zmenilji i denes je pak čudne če se i puce i dečki ženiju do tridesete.

Prie se je unda, na plot ilji na kakef koljec, stare puce na Fašunjeg h jutre narihtal dečke, napravljen od slame. Iste tak je na Pepelnicu staruga dečka dočakala slamnata puca. Ljudi su njim te nastavilji radi špota. Reklje se je da su gizdavi i gda njim nie dober nešče pravi za ženidbu, unda su zavriedilji slamnatoga para. I baš si čovek nemre, a da ne grunta kak bi te denes sela zgledala da se ovršava ta stara šega. Naša draga miesta na Fašunjek i na Pepelnicu, bila bi nakinđana z slamnati pari, kaj cimer z buštricami. Jer, dobre se zna da su sele pune dečkof i puc, a malje gdoj se ženi. Pitam se, pak kaj je došlje na tie sviet?.

Veljiju onie teri se baviju z nekakvemi prognozami da bu Hrvate, za pardeset ljiet nestalje. Če bu tak unda bu i pune prie. Bog si ga zna, kaj je denes temu mladomu svietu kaj se ne ženiju. Imaju sega, alji pune več očeju. Zgledi da te kaj imaju nie dosta nek iščeju več. I one kaj je žalosne hu tomu semu gda pribiraju se one kaj misliju da njim trieba, ljiete prejdeju, safti življenja se posušiju i se je prešlje k vrapcu. Gruntami si pak, da bi morti bilje dobre ipak vrnuti tu šegu, početi vesiti slamnate pare po ploti. Morti bi se unda slobodni opomenulji i nekuga usrečilji z svoju želju. Se si gruntam sake ljete gda lučem na Valjčekove kak se ze sie čoške čujeju tri slatke rieči kak popieva Kićo „Ja te volim“, da se bu nekaj zmenilje. Ruože, dišeče vodice i sakojački čački su daruvani i prijeti na dar. Čutiš da bi se mogle čujti crkvena ženidbena zvona poklje sega. Gda tam. Nič. Se je i dalje po starom. Bertije pune dečkof i te največ za šankem, a za stolji pune puc. I gda mužika zaigra, dečki se tobože umne spominaju ilji pajdašujeju z flašicami. Pucam nič ne preostane nek da se primeju h križbajs i vudri tancati. Čakaju e se bu kaj pripetilje. I pak unda, nič. Zabadave tancaju ritesnice same odeljene šofem, zabadave golji pupeki z rinčicama, zabadave ropanje z lanci za vratem, zabadave fejst jahka duha skupe vodice. Nič se nedogaja.

Stariejši, ovak kak ja se več put pitaju, kaj se sviet tak fejst zmenil. A unda kak da se same po sebe nahitava da z mladem svietem več ne vlada ljubaf. Ilji, ak i vlada unda ona nema več takef šnjof, takve gigljanje po tielu kaj te bar na kratki cajt otpelja do neba. Gda nič ne popaže kaj bi se gledeč med pucami dečkim zmenilje, teške je da bi i viešenje slamnate fački kaj značilje.

Tak je prepala ta Fašnjučka i Pepelničina šega. Alji, prepale su i druge. Same rietki opereju noge h vode h terem se kuhalje zelje na Fašunjeg. Te bi triebalje čuvati čoveka od griženje kač ilji stajanje na trne po putu. Morti i zate denes čovek ima furt hu sebe pune otrova. Ne kolje se na Fašunjek črna kokoš i njena glava zakapa h vrt kaj nej kumer pojel korenje i semenje. Nit je več kokoš, a kamolji črne. A h vrt sme posadile kamienje, rekel je moj jeden sused gda si je malje pogutnul i kritikuval babe. A unda se ni semenje na pririhtava za sejatvu na tie dan. Pepelnice i Pepelnjaki takaj ne hodiju po selu. Na največi post i nemrs pune su ribarnice kaj ljudi kupujeju kaj bi ždrlji. A negda su postilji i nemrsilji si, osim male dece i betežne. Bilje bi i nam dobre da si bar jeden dan deneme ciferšljuse na naše gupčeke. Nej si hčistilji telca od griehe, nek od sega smrada kaj hu se namiečeme. Od sie šegi tere su ostale, ostalje je same hodenje dece po hiža obljiečene h mačkare. Nu ni oni sami, gda dučeju pred hižu, neznaju da te nema nikakve veze z negdašnjim šegami.

„Debela repa debeli kljin, dejte ljudi peneze sim!“
Potribna pak deca, terem bi dobre došel kakva kuna, največ od srama nejdeju po mačkare.

Facebook