Gda denes lučeš ljudi, malje teromu je na ljicu smieh. Če se i nasmiejeju tie smieh je nekak z grčem i na silu. Nikak nie od srca, kaj je mam moči videti i osietiti. Nenasmejana ljica moreš najbolj videti ak jih lučeš onak zestrani da te ne vidi onie teruga lučeš. Z ljica moreš prečitati i žal, i jad i srdu i mam znati da čoveka pritiščeju veljiki jadi. A veljike jade je se več i več.

Cajti su grdi. Nu niesu nigdar ni bilji preveč ljiepi. Sake ljete se pripovieda da je grde, a da bu druge bolje i ljepše. Jeden moj pajdaš tak več put zna iste reči. K tomu velji da se on sam nikak nemre hčakati onuga boljuga ljeta teruga več prec čaka.

I k tomu jadu još čovek furt dobi sakojače, groženje ze sem i sakem. Kak si živime h moderne cajte i nafčilji sme se na nove življenje i te več niesu obljiznieki nek normalna stvar.

Tak su se naši stari trudilji i dalji pune penez kaj su do svoje hižic dopeljalji eljekriku, vodu, teljevizor i malje po malje po hiža su se hvečerku bljesikala plava svetla kaj je bil znak da ljudi ljučeju h oblok teri njim je pokazal cielji sviet ilji ti h teljevitor. Unda za kraki cajt kaj nam nej po hiža smrdel dim gorečuga vugljena i drva i kaj nam nej nažifce išel  smrad pepela z pepelnjaka špareta, dopeljalji sme si i pljineka.

Tak su ljudi na ljiete šparalji peneze i se te z tešku muku platilji. Pri nektere poslije nie bilje dosta same platiti ilji je pak bilje preveč pak su ljudi pljunulji h šake, prielji lupate i kopalji h zemlej kaj bi njim do hiže jeftineše došla vodica, pljinek i kaj česa druguga.

A unda gda sme si se te dopeljalji, počelji sme same šrafiti gumbe. Hiže več niesu „smrdele“ po dimu, pepel nam nie delal prašinu, vodica je curela z pipic, smetje niesme kurilji h špretu nek sme ga ljipe počelji metati h kante ilji vriečke i tak ga se rešavalje. Jeden cajt je se te nekak ljiepe išlje, dok je bilje posla i dok su ljudi z tem kaj su napravilji sami gospodarilji.

Moreme reči i da su ljudi i unda nekak vljieklji i spajalji kraj z krajem, alji se išlje.Unda se nekaj prie par ljiet počelje dogajati. Se one kaj su ljudi delalji nie ostalje njihove, nek nečove. Dogajalje se te tak kak i h jedne familjije gde starec živi z jednem sinem i ž njim gospodari. Tie teri je ostal na domačije hu nju i hlaže, širi ju. A unda se dogodi da se ocu obrne pamet i su gospodaru ne da onomu sinu gdoj ju je privriedil nek nekteremu drugomu.

A tie drugi sam se pomalje smejulji i grabi one kaj njie njegve. Ipak kad-tad dojde do one, po domači rečenie:
„Otete-proklete!“I tak je i nam denes one kaj su stvaralji naši stari, zete i z tem gospodariju drugi. A oni, vužgi kaj se da po ljudem. Saki dobre zna da mora platiti se one kaj mu po žica, po cevlja prihaja i odhaja. Mora platiti i za obloge z teremi luče h sviet. Mora plačati za se moderne šege. I negda se tak plačalje i mora se. Nu čoveku se dogodi da mu negda ne htegne one kaj ima h pobelaru kaj bi namiril se one kaj trieba. A unda mam dojde one:

„Če ne platiš u roku ….., bume te otkapčilji. I h redu je da se otkapčiju onie terem te prejde h naviku. I trieba otkapčiti one teri na peneze spiju, h ljimuzina se voziju, a one kaj potrošiju ne plačaju. Si se zname i sakuga. Nu onie teri, a te se vidi i zna, radi nečega mesec ilji dva niesu svoje računeke podmirilji nie se mam trieba groziti: „Bume te otkapčilji!“

Kak su grdi cajti unda je ljudem još teže gda takve cedulje najdeju pred svoja vraca. Malje bi triebalji pregruntati si oni teri tak nekaj pošiljaju, komu i kak trieba poslati. Ne same da se prieti za skapčanjem nek i sudem, po one takaj starinske:
„Tužil te bum!“ Groziti se je najlježe. Triba teške cajte pregrmeti i čakati nove. Saka viest kak god bila grda, ak se velji na ljiepi način nekak se ljepše čoveka detekne.

I nie se mam trieba groziti, jer se ljudi o tere se ovisi ne groziju. Oni su same več put gda tak nekaj dobiju žalosni, jer se nešče z muku njihove starci ku...či, i maše z papieri na teremi piše:
„Ak mam ne platiš bume te otkapčil!“