Vsakomu med nami pobegne, niti sme h moči vsaki put od toga pobeči, a več pute te niti nečeme. Najgorše je gda se hlovime i gda nam se videti more kak se obrača une kaj smele se obračati nebi, a mi nič druge ne delame nek same kimame i tak za praf dajeme vsemu unomu kaj mu se ni praf smele davati te za praf i nebi.

Navek se zmislim unoga kaj sme se još h detečju dobu nahčiti mogli, priznati se mora i te da nekteri se nigdar te nahčili niesu a iste nam tak te zgledi da se niti nigdar neju. A nahčili sme se i den denes razmeme kak su h kraju kaj daleke nam je, h Judeje nam, Mariju Magdalenu, z kameni zatuči šteli, tam nekteri pajdaši, pajdaši kaj videli su da griehe bogica na sebe velike ma. Unda je došel „Pajdaš naš“ najvekši, unda im same je povedal te da naj hiti bez brige kamenček prvi unie med njimi teri husebe grieha nikakvoga nema. I kaj se je dogodile, dogodile se je te da nihči kamenčeka hitil nie, jer takvoga kaj grieha nie mel mele nie, med vsemi unami kaj zatuči bogicu su šteli. Denes nič bolj nie, na vse strani videti nam je moči nektere tam kaj za vse nas „jake skrbiju“, kaj po vsemi hude glediju, kaj vse skup špotaju jake, a iste tak i sebe nigdar ne vidiju, iste kak niti nigdar se videli niesu.

Kak god da nam Jezušek je povedal i kak navuka pravoga nam je ostavil - „da naj prvoga kamena hiti unie kaj grieha nema“, iste tak na druge nemre kazati unie kaj gorši je od mnogeh med nami. Teške je živeti z grehem, jož težejše je ostati bez grieha, življenje nie ljehke kak nigdar te nie niti bile, same je od vsega na svietu još težejše človek ostati, človek biti i kak človek opstati. Farbica kaj vsaki med nami ju zna z van nositi, največ put i nie vriedna toga kaj človek je, une kaj najvrednejše je - je une kaj vsaki med nami h srčeku nosi, kaj srček ga kak najsvetečnejše meste ma. Srčeke se za nič na svietu potepsti nesme, ponjem se nesme nikakve fljeke najti, za njega se nesme nič druge otprieti nek same najčistejša rieč, dušica ili cvietek kaj po svetečne dišobe ga poznati moreme.

Unda ti niti za razmeti nemreš kak ma pajdaše kaj vse druge vidiju, kaj same po drugami z prstekem kažeju, kaj vse špotaju, po vsemi smradiju, kaj nigdar nič druge niesu povedali nek te da nič ne velja. Same su navek povedali te da uni su najbolši i najpametnejši, da od njih bolšeh i vekšeh nie, pak niti nemre i nesme nič druge niti male več i bolj se pomeknuti, jer mam žal im bu. I unda gda žal im bu, kaj buju napravili, napravili buju te da vse spljuvali buju, a kak se veli unie teri po vsemi preveč se napljuval je i sam spljuvan ostane, jer drugač niti nemre biti.

Vsaki med nami, i gda ga če povlječi, gda ga če potegnuti, gda naopak bi skrenul mam, jer navek je lježejše se naopak hititi, unda gda dojde do toga da misliti mu več bile moči nie, unda se moral bi zastanoviti. Nihči ne poveda te da se za istinicu nie trieba boriti, ali te kaj istinica je i kaj po druge strani jal je - te nekaj je čist drugačkoga. Za istinicu zaistinu vriedi živeti i za istinicu jedine je vriedne se boriti, a unda gda z srčekem jal ti komandera, unda same završiti moreš unak kak vsaki naopačnjak i mrčnjak završi, sam i bez unoga kaj sprodal je unami kaj vse h življenju z penezeki su si pribermali, kaj navek im najmilejše človšku dušicu i srčeke h krivu stran otpeljati, da k sebe bi ga pospravili. A življenje same penezeki niesu, življenje nie niti stolček, stolček na teromu iste tak za navek nemre se biti, življenje je same srčeke najčistejše, poštenje jedine i rukice najčistejše. Tu življenje je putec kaj jedine nam ga je Jezušek zacajhati mogel, kak une najvrednejše kaj za druge trieba cieli davati se, kaj vsakomu pomoči je trieba i kaj na nikoga se nesme jalen biti. Življenje ma mesta za vsakoga med nami, iste kak je istinica najvekša ta da nigdar h srčeka meste za dobričke vsemi med nami bile nie. Po druge strani još vekša istinica je te da človek vsaki med nami triebal bi biti, da odhititi navuk mrčnjački triebal bi, da z dušicu najčistejšu za vrieme kaj pred nami je - pripravil praf se bi.

Kaj se zmisljime zdaj kak je konec toga kaj povedati sam Vam vsemi skup štel, zmisljiti se bi štel toga kaj se je z „Najmilejšem“ dogodile, z „Pajdašem“ kaj do hčera su ga vsi po pleča trepali. Dogodile se je te da pleča su „Mu“ mnogi obrnuli, a vse „Im“ pomogel je. Jedine nam unda i vse te skup zgledeti more - kak da vrieme nie se pomeknule, kak da živime još navek h vrieme gda po svietu „Je“ hodil.