Pretpostavljam da ste primetili table z turistički putokazi na naši cesta. Akcija kak je postavljanje ovih tabli trebala bi biti jedna od par takvih akcija godišnje, no ova je prva teru sam videl od kad znam da postoji Turistička zajednica naše županije. No, kak sam imel za čujti niti to Turistička zajednica nije napravila sama nek su morali pomoči ZARA i Županija.

Se mi se čini da bi se to postavile i bez TZKZŽ, jer, več sam o tomu pisal, nije mi poznate kakvu su akciju radnice i radniki ove zajednice poduzeli, a da bi bila vredna spomena. Lježe je dobiti podatak kolike su penez potrošili na vlastiti pogon od kojega zagorski turizam nije imel nikakve koristi.

Saka čast onemi teri su zaslužni da se ovakvi putokazi konačne postaviju, nadam se same da neju ostali takvi par ljet nek da se buju na vreme obnavljali i nadopunjavali, jer su još daleke od savršenstva.

Mam sam se zmislil autobusnoga reda vožnje teri je na bivšemu kolodvoru v Zlataru stal bez promene prek pet let, makar več autobusi nisu po njem vozili. Zamislite da čekate autobus vuru i pol i onda skužite da vozni red ne vredi.

No nadam se da buju novi putokazi pratili stanje aktualne turističke ponude.

I sad one pitanje kaj me največ muči.

Kaj je to vinotočje?

Doj je tu reč zmislil i doj nam ju je nametnul?

Pa kaj mi morame progutati baš saku glupost koju nam nešči uvali?

Zakaj se naši turistički radniki nisu izborili da se na području Zagorja takva mesta zoveju tak kak se i zoveju – kleti – pa bi na putokazu lepe pisale de je čija klet, jer vine se čuva i toči v kleti. Reči vinotočje je glupe. Vinotočje bi bil diskont de se toči od litre na več nekakev bučkuriš, a kad v reči klet nalazi sadržana je tradicija Zagorja, ljubav i osečaj koji Zagorci imaju prema trsju i vinu i to se nemre i nesme zvati vinotočje jer se muka koja se na kraju odražava h vinu nemre natakati same tak.
 
Mi tuj v Zagorju zname reči «ideme kleti» ili «bili sme pri kleti», pa kaj bume sad govorili «ideme vinotočju» ili «bili sme pri vinotočju».

Brze morame pregledati naše zagorske pesme da vidime de se se spominje klet, jer od sad se bu morale spominjati vinotočje. Npr. Išel budem v kleticu, sad se bu popevale - Išel budem h vinotočje zel si budem holjbicu i pečenu puricu!

Jasne dok i holjbica i purica neju nazvane nekak drugač.

Baš me zanima koja je budala zmislila ili pristala da se naše kleti nazivaju vinotočja.

Pa klet je jen od simbola Zagorja i naziv klet – meste de se čuva i toči vine trebale je čak zaštititi, da majmunem ne pada na pamet da pristaeju na nekaj kaj nije zagorska terminologija, a bitne je za predstavljanje posebnosti našega kraja.