Prošli sam tjeden bil na otvorenju GFUK-a v Krapine. Krapinska Festivalska dvorana za mene je meste poznate po Krapinskom festivalu i tomu sličnim festivalčičima zabavnih popevčic do terih ne držim v najmenju ruku nič, kaj je i normalne s obzirom na moj glazbeni ukus o teromu se ne treba raspravljati.

Adam Končič poznat mi je ko osoba s teru navek merem spiti gemišt, pomoči v kakvom poslu, najti se v društvu, uključujuči i glumce, ali nigdar ga nisam imel priliku videti ko organizatora nekakve manifestacije. Moje iskustve z glumci tere poznam obične je bazirane na susrete v teremi dominira jele i pile, a ne ni njihov ni moj kulturno umetnički rad (osim radnih akcija v nečijem trsju).

Prva stvar tera me je iznenadila je bile da političari nisu imeli posebni tretman. Scene z raznih festivale de političarke z mužmi ili političari z babami sediju v prvom redu i plješčeju radi reda, telečega pogleda prema bine s tere im se dodvoravaju različiti izvođači ovaj put nije bile. Bila je same publika, pozvana ili ne, ali bez hijerarhijskoga postrojavanja. Barem ja to nisam primetil. I prije nek je predstava počela nije bile nikakve posebne govorancije, osim par Adamovih reči. Da je rekel i koju više nišči mu nej zameril, jer se to i očekivale.

I onda konačne prva predstava. Mislil sam da bu to nekakva poluselska prilagodba nekakve predstave tak kaj bi ju skužila i progutala publika vajna kakvom lahkoglazbenomu festivalu. No viš vraga! Pak sam bil v zablude jer predstava, zapraf mjuzikl, opče nije niti male sličila na tak nekaj. Bila je to priča podložena z rock mužiku, kaj me je iznenadile i kolike god sam mislil da bu dvije vure teške odtrpeti na stolcu ni jednoga trena mi nije bile dosadne.

Sečam se kad je svojedobne na Danima Đalskoga čitan odlomak z Jergovičeve knjige Sarajevski Marlboro uz pratnju klasičnoga klavira. Užas!

Ovde je bile baš kak treba. Čak se ni zidi dvorane navajeni na popevke nisu bunili, a publika je odlične reagirala na rock!

O nastupu glumce ne bi pisal ne zate jer ih neču spominjati, nek zate jer mislim da nisam pozvan za glumu davati ocene. Kaj se mene tiče super! Posebne mi je bile drage videti naše Jucija i Adama ko dio profesionalne glumačke družine.

Negda nič druge ni ne treba reči nek odlične i fala na muke tera je uložena v organizaciju. Normalni ljudi probali buju dojti do karte da pogledaju nekaj od bogatoga programa, a dežurne kritičare ne treba ni poslušati.

Čak sam neki dan čul trač da sam osobne odgovoril Adama da festival organizira v Zaboku! Ne da nisam, nek da me je pital za pomoč drage volje bi se uključil bez obzira bile to v Krapine, Zaboku, Bedekovčine ili Desiniču! Uostalom ovakev se festival ni nemre organizirati ak se nema de, a kolike znam, jedine je dvorana v Krapine, nakon renoviranja, prostor v teromu se tak nekaj more i splati organizirati.
Adamu i društvu z organizacije saka čast, nadam se da buju imeli volje i snage ovaj festival nastaviti!