Moči negdar je krive i prejti, moči je da se dogodi da med nami vsaki zabludel bu, ali une kaj moči nie je te da vsaki med nami nezna meste kaj za njega je i da se sprehitavlje unam kam nie iti mu trieba. Kak vsaki ma iste tak dobu kaj z dneva h dnev najbolj ga tihči, i kak god da vsaki med nami nie se zestati mogel nigdar z ničem drugem nek z cunjki i spotrieti črveki, iste tak se i te vse skup na druge nie mogle otprieti nek na jeden najvekši del kaj vsaki med nami štel i mogel meti ga bi. Nie same tak gda nekaj maš, još je gorše gda si misliš da te nekaj najvekšoga i je, ali življenje kak življenje nigdar nikomu med nami neda i nebi dale da se skrene preveč put. Morti se i more skenuti teri put, ali une kaj je jedine i kaj stoji - je te da gda se skrene preveč put – da iste tu najdrajše življenje, kaj za vsakoga med nami meru ma, unda gda najmenj se tomu i nadali bi – vsemi skup vrnule bu une kaj triebale bi.

A doba kak doba, negdar doba poljehku prešla poljek vseh nas je skup, negdar se spustila med nas da niesme praf znali e te zaistinu una je, a največ put je med nami, a da najti i hloviti nemreme ju. Najlepše je – „veliju nekteri“, unem kaj ideju sim tam, bolše reči denes sim a zutra tam. Morti je za razmeti i te da nie vrieme tu kaj se more dotreči, da se same dotreči more vsaki med nami. Tak človek če h življenju da ga zvezdice pod svoje deneju, da se nigdar ne spusti tam gde drugami štel nebi, da vsemi i furt pove se jemput za navek – da nehči je tuj gde se niti pogledati neče. Da te iste ostal i bi, jedine kaj praf je – je te da nigdar moči nie ostati ti na mestu, jer meste niti nie a niti čakale bu.

Da razmeš te kak „pajdaš“ se z tobu spomina, da se češ znati i obračati, da se znaš vsaki put otprieti i vse te skup razmeti, te iste tak je za razmeti kak vse une kaj se je otrgnule ne pre rane, a pak niti ne pre kesne. Da nie same tak moči negdar rastumačiti si moči da nie vsaki med nami „človek“, da i un teri se za „pajdaša“ dela navek iste tak pajdaš nie. Dok vse te skup ti se razdeni – vrieme ti prejde, tak da ti se vse te skup spošumeri. Rieč nie une kaj je jedine bile moči otprieti, rieč je bila jedina unda gda nie bile nič druge, jer rieč je rieč i nič druge, a tuj pak i nie furt tak – kak dobre poznate je.

A da denes sim, a zutra tam, te je kak normalne postale, a da „te po prave strani“ te praf nigdar smele postati nebi, toga se vsi mi skup spamtime unda gda sme več praf za praf čist skrenuli. Denes, gda doba je ta, doba gda se bi triebali ne same zmisliti na Majčicu najbolšu, na Unu kaj je Jezušeka nam najmilejšega rodila, denes gda nebi smeli srčeke meti drugačke nek najčistejše – mi do toga sme došli da jedni drugami h uoči pogledati nemreme.

Kaj te se na svetu dogodile, zakaj se je mrčnjakem pak dale da po vsemi nami skup gaziju, zakaj im niesme povedali i pokazali da tak več im nebu i nesme iti. Doba kak doba, navek bile je i bu zločice, navek bile je i bu uneh kaj zabludeli su, navek vsaki med nami skrenul bu – več ili menj. Une kaj vsaki med nami more, te je nekaj kaj iste tak neda se drugač dopovedati nek kak putec i doba kaj zazava, kaj vsemi poviedati zna, kaj če vsemi skup odnesti une kaj se odnesti navek je i trieba – odnesti une kaj vse nas pak zdiči more. A te je same navuk jeden, jedini kaj sme ga od Sina najvekšoga dobili, da kak človek more vsaki med nami človeku biti, kaj je najbolše ali najžmekšejše. Zmišljavam se hutu jutrajnju dobu otom gde sam je i kam pem, kak god da lete ideju i kak god da znati vsaki med nami trieba da nič za navek nie, pravica je jedna jedina – poveda vsemi da same človek i pajdaš – za navek ostali buju.