Vsakejački te zmešati moreju zrvrkljivci, vsakejačke ti huncentarije po glave hoditi moreju, jer lježejše je hgreznuti nek se zdiči. A da nikomu ljehke nie i da mnogi poklje nas iste tak šteli bi da male ih se pusti tak kak vsi skup bi stepavali – te je zaistinu nekaj kaj nam more se  same po sebe največ i povedati. Da nekteri tak gliboke hgrezneju, tak da poklje im vse te kaj kak zabludeli delaju več niti se nič ne dotikavlje – te je iste tak dobre poznate. Iste tak kak god da teh jake zabludeleh i nema preveč, nema preveč niti uneh kaj griehu bljizu nedaju si dati. Največ med nami uneh je kaj sme grešni, kaj zname da sme več put zabludeli, kaj moreme povedati da nam je žal, kaj i šteli bi da več ne hgrezneme, ali kaj sme i dalše same jedne – grešni, kaj sme unie teremi ljehke nie.

Da negdar nie same tak, da nie same tak moći si navek i počinuti gda najbolj te štel i bi, te je une kaj nie ti ljehke niti si zviti, niti se otprieti a bogme niti se otrgnuti od diela deteče smehoće, smehoće kaj same će da se vrne. Put da je put, steze da su steze, ciepi da su ciepi, lepota da je lepota, te vse skup je tak praf kak praf nič druge na svietu bile nie. Nie same tak pogledati vsikud i nie same tak otprieti une kaj otprieti neda se, jer putec same je jeden, jer rože same su rože, jer vrieme je same vrieme, a cvetje morti i nie cvetje, kak jeden stranjski pajdaš je povedal da i cvetje more cvetje zločice biti. Kak god da nie ljehke vsakomu med nami nutre gljiboke, kak god da ga več put i trga h glubline, iste tak nie same tak gda nekaj te ščekne gda najmenj se tomu ti i nadaš.

H vsake kmice putec se zagleda, prie ili kesnejše, ak h srčeku i h dušice maš une kaj najtoplejše je. Unda maš, pajdaš naš najdrajši, unda maš i vse une kaj dobre biti ti i trieba, jer same se dobre more z dobrem zestati. Zločica nigdar nie z dobrem dobrička bila, navek je još zločicu vekšu poiskala. Gde se da poiskati une kaj vriedne je, gde se more najti une kaj splati se najti, gde je putec kaj triebal bi biti najbolši, gde vse je te kaj se ma za une kaj nie same tak odmotati moči. Da moči je bolši biti sigurne je i te da vsaki med nami zgledel bi drugač. Te da negdar male gdo med nami te i če napraviti - te iste tak je po pravice. I unda dojde ti da sam se štel bi počinuti, pak neznaš kak te bi ili kak te nebi spelal, jer male bi pak male nebi, tak da vsi skup kaj te glediju neznaju niti kaj stoji za temi oblokecami i kaj se neče spustiti unda gda najbolj se spustiti bi triebale.

Da une kaj preveč se zdiže nie dobre iste tak kak i une kaj največ put se neda zdiči, te mnogi su med nami ne jemput sprobali. Vsemi kaj dobre se znaju spominati vse te skup ziti more tak kak je jedine i moči, a moči je same tak da se če otprieti une kaj se nie niti misljile otprieti. Una doba kaj vsikud povedala je da se vriedi hmeknuti ili da nie vriedne se htekavati, te doba je kaj znala nigdar dobre nie se zestati sama z sobu, kaj se je navek čakala negde z druge strani, da morti nehči došel nebi da male pogleda tuj gde se nie smele pogledati.

I gda ti „pajdaš“ tak ceduljicu nacajha, gda ti pajdaš se spremišljavati počne otom kaj bi ti dal, kak bi zate vse na svietu od srčeka si otpustil, pak ti unda nie nič druge niti za razmeti moči, nek te kak moči je predrieti i med trdanjkami se najti. Da nie ljehke za razmeti i da se je trieba same male po male otpirati. Da triebale se spigane još bolj zviti i da se bi krenule vse te skup još bolj zvijat, te je une kaj dobre spreštuderati bi trieba. Vsemi skup se bi triebale same male spamtiti jer nie moči niti drugač povedati kak je vriedne pred vsemi povedati da nie se trieba pred nikem zastanavljati, jer te nie bile niti za nič druge nek za jeden veliki i svrabljivi beteg. Te zaistinu nie od hčera ostale. Gda tak dojdeš do toga da mira štel si bi žiti, dojdeš do toga da te skore da i nie moči spelati, jer mira retke gdo med nami ma. Da mira nie moči same tak niti najti, da kak god da štel se bi počinuti i hmiru biti, navek te nekaj odvlječe i piče i piče. Tak se zmisliš da i Gospon naš nigdar mira nie mel med nami, da navek je vsemi drugami mir bil, da vsemi se je kak tiele najčistejše daval. Mira je moči same dati, jer h miru se more najti i h miru se more otprieti same jeden putec kaj vriedne ga je otprieti. Tak je otprla se i una doba kaj se more otprieti kak nekaj kaj vriedne je, kaj se more dodelati kak une kaj nie se prie mogle. Gda vse te skup i zagledaš ostati ti same jedne more – srčeke ili vse kaj nie moči ga gledeti se z stene kaj se sama štela stisnuti k une kaj dalše je. Vse te nie same tak moči –jer mira moreme vsi skup meti same ak verjeme h Jezušeka, Jezušeka kaj jedini nam mira dati more.