Kaj te je, kaj te triebale bi biti gda te žeja pustiti neče, a doba je takva da vsi si radi spiti bi šteli. Kak za rastumačiti je te da piti nesmeš, da nie dobre da nie te same tak naljejati se i za volaneka si sesti, a vsaki dnev moreš videti i čujti kaj nastradal je mnogi med nami, kak se je potrl, a ne same da je potrl i sebe nek je čudaj uneh nastradale kaj krivi mu nič baš bili niesu. Same su se bogčeki našli hute vrieme na krivomu mesteku, same su se na putecu našli gde im nie suđene bile, dok je nanje nehči naletel kak se po domači veli – pod paru.

Vsi sme več put hudi kak se te piti nesme, kak si niti kupičičku spiti nesmeme, nemrem niti sam povedati da nigdar si kupičičku spil niti niesam, alji iste tak povedati i priznati sam sebe triebam, da na svietu človeka nie a niti more biti, teri je pameten dok si spije. Morti bude nekteri med nami male veselejši, morti bu nekteri i bolše volje, nekteri buju mam na sebe najbližejšoga skočiti šteli, nekterami se bu mam jake spati počele a nekteri buju mam najvekši ljubavniki postali. Pijačica nam najdrajša na vsakoga drugač deluje, nekoga žari a nekoga i zlamlje, une kak na vse deluje je te da na vsakoga deluje tak da več nie tak fljetni a vsaki med nami si mislji da mam vse more, mam kuražicu ma vekšu.

Kak se zaistinu i priznati mora, da pile se je od gda sveta je i veka, i da dok sviets bu bu pijačica se pila. I vsaki tak se je mogel pri takvomu posljeku najti. Nie unda niti za zameriti ak si negdar i spiješ, nekaj je čiste druge ak se ne vidiš pri tom posljeku. Te je zate največ jer videti ljehke se nie pri pijačice, još se je težejše poklje zmisljiti nate. Kak nam se tak nekak i ta doba najdrajša - Vincekovska otpravila a Martinjska nam još nebu tak brze došla, kak se čeme male bolj i spreveseliti, kak se čeme z pajdaši najti, tak nam se je male trieba i nekak drugač postaviti. Nie za zaneriti nikomu med nami ak se bi štel z pajdašami najti, te triebale bi za pohvalu biti. Nie trieba špotati nikoga med nami ak bi vesel štel biti, te iste tak nam pozdraviti je i trieba. Une kaj dobre nie, kak god da vesel češ biti, je te da prejdeš si spiti i unda bi štel za volanekem voziti. Mnogi med nami gundraju, a i jas sam med njimi, gundraju i povedaju da nie h vredu ak same si jednoga gemišteka moreš spiti a da unda nemreš voziti. Vse bi te hvredu bile gda zaistinu bi te bil same jeden gemištek, rietke gdo med nami stane same na tomu jednomu gemišteku, male se teri med nami zastanovi, največ nas je takve kaj ideme dalše. Unda ti tak zide gemištek na kvadrat, pak na kubik i dalše. Unda se i dogodi te kaj se dogodi.

Povedali su mi tak pajdaši z Zagreba grada da im je h jednu ruku dobre došle te kaj nesmeju piti. Tuj pak moram točnejše povedati da nihči im nie zabranil piti. Istina je pak da sme zemljica slobodna, pri nas vsaki pije gde i kulike če, (ak je punoljeten ili ak je na punolječenju bil). Druga je stvar kaj mi tie pajdaši povedaju da bi najrajši si kombijeka zeli z šoferem, da bi bez brigice mogli se praf poveseljiti, a kak se i šika pri tomu si i male zaljejati. Tak do toga sme došli da nihči nie zabranil ljudem piti, same je zabranil da si spijeju i da se tak z ljetrikicami voziju. Mnogi med nami povedali buju, da te na isti dojde, mnogi buju pak povedali da pri nas ljudi razmeti moreju same unda gda ih nehči po kolubareku hdere.

Jas bi prvi bil zate da se more piti i da se more voziti, same je trieba povedati i te da nehči mora i pameten biti, jer pak nie niti za odhititi navadu kaj se je mogla h zajdnje vrieme videti. Ta navada vam zgledi tak da se h auteku več pajdaše pribere, pak je jeden na pokorice, kaj vodicu cielu večerku piti mora, tak da more z mirem k domu vse pripeljati. Gda se drugi put nekam ide unda na drugoga pajdaša je red i tak se vsaki put menjaju pri tomu teškomu posljeku.

Zate kak god sme vsi skup šteli da vrne se merica za pijačicu,  iste tak sam i mišljenja da ak češ piti da doma triebal ti biti vsaki med nami, kaj pak nie same tak ljehke. Moreš si iste tak nekoga najti jer jer pajdaša denes teri če piti - za ljetrikicu voziti najti nemreš. Teške je med pajdaši najti une kaj voziti bi šteli, lčježejše je najti une kaj se kriepili bi rade. Te vsaki med nami dobre more znati i h špigljeca se trieba mu se je pogledati. Nie tak h vredu same po po drugami kazati i vse druge špotati, jer prve ti je trieba sam do srčeka si dojti, kaj ljehke nie.