Vsikud gde si bil, čega se spamtiti moreš, gde si se mogel z nekterami poznati i najti, vse te skup ziti ti triebale bi unak kak štel od navek si si, a furt te tak ziti ni mogle nie. A da mnogi put te ne zide tak kak zišle je – te je iste tak za razmeti, jer vsaki med nami dobre zna kaj je življenje i kak navek mu vse hunjem ne zide tak kak te štel si i bi.

Nie same tak gda nie ti moči oddelavati vse une kaj je vriedne h življenju, kaj nie moči drugač niti nek same tak da se obrne i otpre une kaj se triebale bi otprieti. Da med nami vsaki griehe ma, te je zaistinu i tak, na drugu stran je i te da grieha ma zaistinu vsikud, same nie med nami vsakomu moči dopovedati te da grieha ma – da tuj med nami je. Iste tak niti vsaki med nami priznal nebi da z griehem skup po svietu hodi, jer kak god da ga življenje na vse strani po svietu zločicu i hiče – najlježejše se je pokriti po glave i od svieta pobeči, lježejše nek pogledati sam sebe gljiboke. Nie se zaistinu iste tak od grieha ljehke otrgnuti, nie se ljehke niti otreči od vsega unoga kaj prati te od unoga dneva gda prvi put na krivu stran si prešel, gda prvi put si hgreznul i gda prvi put ti se dogodile da posluhnuti štel niesi.

Gda zebirali bi putece, gda se bi šteli hputiti tam gde grieha nie, gda šteli bi od njega zbeči, zaistinu nebi nam ljehke bile tu odluku donesti – jer grieh je vsikud gde se obrneš, gde najmenj mu nadaš se, od njega nie moči pobeči. Kak god da pobeči nie od grieha moči, kak god da ljehke nie poljek njega i biti, kak god da najrajši bi ostal pod rubcem z terem se bi štel pokriti – da se od vsega na svietu odmekneš, iste tak nemreš tuj si nič pomoči jer grieh navek tuj ti bu poljek. Une kaj ti moči je, une kaj ti jedine ostati more, te je same i jedine vrieme, te je doba kaj se neda odmeknuti – kaj se neda obrnuti, te je doba tera vsikud vsemi poveda da nie stati trieba. Vsemi se je tak trieba obrnuti i vsemi je trieba povedati da razmel si. A razmeti ti same je jedne moči i trieba, a te je zaistinu same te da se je trieba zastanoviti, da se je trieba zdiči, da se je trieba boriti, da griehu se nie trieba dati, da ga se trieba hništiti, mam, več h cajtu unom kaj prvi se kaže – kak spominek kaj ga za navek zase štel bi meti.

Da moči te je ljehke dobiti, da moči se je navek praf obrnuti, da je moči navek na strane biti kaj bu se zdigla, unda vse bi bile tak kak se nie nadati trieba. Življenje kak god da si negdar te i priznati nečeš, nie same zacajhane kak ravni ščapek, življenje male ide sim pak tam, male se zdiže a male i hnadol ide, a unda se navek i furt vrne unde gde ga je navek vse te skup i tirale. Kak god da te češ ili si nečeš priznati, kak god da ti h življenju je ljehke ili ti ljehke nie, kak god da življenje morti i ne zgledi unak kak te si šteli vsi mi skup i bi, iste tak je jedina istinica same te – da same mame tu življenje, jedne. Da druge življenje nam nie, tak kak god da vsi skup se čeme odmeknuti unda gda stisnuti skup triebali bi, kak god da se nigdar niti nemreme zestati z drugem nek z svojem življenjem, unda se pak vse ti te skup more zmešati i postati tak kak je zmeknuti se i štele, kak jeden debeli i frčni trdanjček.

Puteci življenjski iti moreju vsikud, negdar ti čeju povedati da nie same tak se spominati, jer dok se spominaš more te nehči čiste na opak nateknuti, tak da kak god da se zmišljavaš  iste tak ti niti nič druge ostati nemre – nek same male detečje okece, okece kaj se pred vsemi štele bi male i pomutiti. A da se zebrati ljehke more unda h življenju nebi bile moči se otprieti i nebi se bile moči z vsem zestati, tak da gda za sobu buš jemput pogledati i mogel, mel kaj buš i videti. Da vsaki med nami navek pravoga puteca zebere, te zaistinu najbolše bi bile. Iste tak da te i nie tak – i te dobre si priznati vsaki med nami trieba. Une kaj jedine bi biti nam triebale na srčeku – te je te da čem več put se bi na pravu stran deli, da se spominame praf i da praf delame, da zločice dati nigdar nedame da prebljizu mam tojde. Tak sme nahčeni, takev navuk sme od Jedinoga kak dara dobili, kak dara teroga mnogi niesu razmeli, kak i denes ne razmeju da vse je rad trieba meti, kak brate i sestre jedine, najdrajše, kak i Un rad je mel i navek ma.