Piše: mr.sc. Rajko Fureš dr. med.

Misliti se med nami vsaki more, gruntati iste tak, kaj zišle bu z vsega toga te nekaj je čist drugač i te vriedi same tuljike kuljike vriedi najmenjši med nami. A i tie med nami teroga za najmenjšega mame vekši je i bolši bormec nek mnogi si te misliju, vsakoga trieba kak človeka gledeti, do njega držati, ž njem se pospominati i meti vrieme, srčeke i vse une kaj se šika. Tak teiebale bi, a e tak zaistinu navek i h življenju je, i na te vsi mi husebe zname odgovora jedinoga – da navek tak i nie. Navek sme si sami sebe na svietu najprvi biti šteli, navek sme se od drugeh ljudi odmekavali, nigdar nam nie bile baš na prvomu mestu te da bi se negdar našli i poljek uneh kaj im največ trieba. A življenje za vsakoga meste mal, življenje za vse more biti najlepše, same se trieba je boriti, same se je trieba kak človek pred vsemi pokazati, ne h žepeku figu kazati.

Figica kak figica, negdar ti je najmilejša, dok ju unak frišku pocicati češ, dok z mesnatem se z pravem veseljičem češ pospominati. Z druge strani une figice tere se h žepeku držiju nigdar pravoga žmaha mele niesu a niti mele buju. Kak se i poveda navek nie same tak otprieti srčeke i do dušice dojti, te zaistinu ljehke nie. Te se iste tak niti same tak nemre, te kak god da je – trieba i šteti. Nikak nie moči negdar dopovedati vsemi unami teri si gruntaju kaj vse h življenju moreju, kaj vse h življenju došle bu im – da iste tak kak i vsaki med nami prešli buju i zginuli kak da nigdar na svietu ih ni bile nie. Figice z žepeka žmaha niesu mele nigdar, tie žmah gdo god da probal ih je – bil je navek nekaj kaj najkiselejše bile je h življenju, te bile je nekaj kaj nie same tak se mogle rastumačiti, jer vsi mi h življenju čeme si same male veseljiča, same male srečice. Nigdar si nihči med nami nie štel pelinčeka na jezičeka deti, niti une najhujše da bi z tem vsem skup se porihtaval, još menj nas je vseh skup kaj dali bi luckami i mrčnjaki da po nas gaziju i nad nami tancaju. Figice kaj tie mrčnjaki maju, kak god da lepe zglediju, kak god da mamiju nas – zaistinu nigdar mogle nebi zmeniti i zameniti une kaj se je dele i mele za nekaj najlepšega kaj srčeke naše ma – a te je dušica najčistejša, zagorska.

Da bi za življenje nekaj povedal, e je trde, e je lepe, e je fljetne ili mudne, e za vse nas skup mesta ma, e se spominati če ili mu je nekaj čist naopačne na prvomu mestu – te je une kaj ciele se življenje išće i te je une za kaj nigdar povedati neš niti mogel kak zaistinu te i je. I da življenje je same lepe, da zločice hunjem nie, vsaki med nami nebi unda niti znati mogel kaj za delati mu je i kaj se praf za praf hunjem vsakomu dogoditi med nami more i bu. Jer da vse navek furt ide tak kak sami si čeme, kak god da vse sme si kak puteca h življenju zacajhali – navek nie tak kak mi te si gruntati bi šteli i navek nie vse tak kak se h prvu dobu i kazale. A življenje navek za sobu vlječe vse une kaj niesme ž njem si dopovedali, navek se spomina i navek nie unak kak sme si ga h senja videti znali. Jedine kaj je furt pri njem dobre poznate – je te da ž njem se nigdar nič znati nemre, furt mu trieba se za nekaj držati, da vetrek te otpuhnul nebi.

E je moči vsejedne nekaj si ciele vrieme otprieti, e je moči nekaj napraviti, e je moči za nekteroga med nami povedati kaj je i kaj bu, e je moči vse te skup držati na kupu? A pak kak god da si gruntaš, kak god da štel bi jedne i druge na kup deti, kak god da ti je vse te skup mogle ili triebale ziti nekak drugač - a unda si dobil pak vse kaj niesi se niti male nadal. Življenje zate gledeti trieba kak nekaj kaj navek te spekle bu, a pak te bu i podragale unda gda najmenj tomu se nadal i buš, unda gda tak i tomu se pririhtaš vse ti te skup lježejše bu, mam vse ti se tak te skup srčeku prijemale nebu. A unda gda sam odgovoriti pred vsemi triebal bi na pitanje tu – kaj i kak, vse ti unda te skup lježejše bu, jer niti buš mogel a niti buš triebal kaj odgovoriti, same ak živiš tak kak Najvekši nas vse skup je vučil. A vučil nas je da h življenju več put ljehke nie, da več put si bume mukicu žili, več put nek nekaj ljepoga. Ali naš najdrajši Jezušek iste tak nas je vučil da za vse te ljepe iste tak vriedi živeti, jer da same tak del bume pravoga življenja, ne unoga kaj same prešle bi poljek nas.