Piše: mr.sc. Rajko Fureš dr. med.

Nejde ti nikak, kak god sa se zdiči bi štel navek i navek se zrušiš i nemreš nikak nič z sobu si napraviti, pak ti niti nie za zameriti ak nekteri put se obrnul bi a neznaš kam i kak. Prejde vse h življenju, dojde i bude, vse se odvrti i vse se otprieti morti i more, ali une kaj se samomu sebe nigdar neda dopovedati – te je same jeden najmenjši zvirek, zvirek kaj se neda z ničem drugem odprieti.

Gde je vrieme i gde su ljudi, gde je doba i kaj se ž njimi more oddelavati o tom kaj je i kaj nie, kam pe i kam ne, jer jedine je i same moči se otprieti vsemu tomu skup. Nie ljehke, nie ljehke dok življenje iščeš, dok si češ dopovedati nekaj otom kaj ti trieba – a neznaš kak vse te skup i bi, tak da kak god da si bi štel nekaj drugač i spospraviti, iste tak vse te skup niti nemreš dobiti na pravu stran, tak da jedine kaj za vsemi nami sigurne bu i ostale – same je jedne drage i ljepe nič. Nič bu ostale ak neme praf  živeli, ak neme se Jezušeku okrenuli, ak neme življenje z drugami živeli, jer življenje je te kaj trieba praf spreživeti, jer same je jedne življenje da bi ga se spoteple. Nigdar več, kak god te negdar bi i štel, une kaj si krive napravil, nigdar več vse te vrnul neš, a tak teške vse te skup buš i vrnul nazaj.

Vuzmene svečice dok se još zmisljime, kak da nam je snočke kmične vse razdenila, iste tak nam i vse se druge praf kaže, ne unak kak morti sme i šteli – nek unak kak te je i trieba. Nie same tak videti nekaj kaj se videti neče i ne videti nekaj kaj triebale bi, ali prie ili kesnejše nebu se več pobeči mogle, kak od samoga sebe tak i od vsega kaj na svietu triebale ti bi biti najdrajše. Kaj povedati hutu jutarnju dobu, gda vse još spi, gda vse te skup nam tak i muči, gda vse te skup štele nebi nič druge nek da ga čem prie i čem bolj pretrgne, da bi male po male mogle se zdiči unak i unam gde je jedine vriedne te da se nemre nič naopačne i zmešane otreči od onud gde nie bile vriedne. E je moči zmeniti i genuti, unda gda se morti nekaj i more oddelati - a pak se po druge strani figa friška h žepu drži. Iste tak pitanje vsemi skup se postaviti more otom kak te moči je i za razmeti a iste i za zazlameniti, gda se morti nekaj štele bi zmeniti – a pak se navek skrije nekam gde se nič ne vidi – da nebi morti nekaj triebale se otprieti.

Te su Vam vsemi skup tam nekteri puteci kaj nič druge ne povedaju – nek te kak nie nikak i kak nikak i nikam nebu moči. Iste tak vse te skup zišle bu tak kak bu i ziti triebale, tak da je tie putec teroga bi hutu jutarnju, još megljenjsku dobu najti i šteli, nekaj kaj bu donesle nam une kaj navek sme iskali. Te more same putec jedini biti, putec kaj Jezušek ga nam vsemi skup je pripeljal, Jezušek najdrajši, kaj največ ma rad nas vse skup, kak dečicu svoju najmilejšu.

Putec nam negdar je morti se i krive videl, kak da je sam prešel tam gde nie te triebale, ali kak se veli niti je vse te skup tak kak se h prvu dobu more videti, a niti furt te zijde tak kak zišle je. Puteci vsi, po terami si hodil do zdaj, tere si iskal, po terami si hodil – negdar sim pak tam, a več put i praf, vsi tie puteci nigdar drugački bili niesu nek su navek i bili – a bili su furt i furt same unakvi kakve sme si ih i zvrteli.

Kak god da teške je odgovora na pitanje najti – kak na svietu živeti, a zname da nie nem ljehke – vsemi skup, iste tak je same odgovor jedini tie kaj vsemi skup poveda kak trieba i kaj nam je za delati. Te je odgovor pravi – a poveda da nigdar se skrenuti nesme, jer Jezušek je preveč za vse nas napravil, življenje je svoje jedine za spas vseh nas skup dal, tak da nihči med nami nigdar nesme niti drugač iti a niti se nekam drugam obračati, jer nate niti misliti nesme a niti praf ma. Fala Jezušeku navek triebame povedati, po njegvomu se navuku navek triebame voditi, jer te je jedini putec kaj poveda nam kak praf na ovomu svietu i h ovomu življenju triebame se vladati, kak za druge, menjše i boge triebame se davati. A same Ga je rad trieba meti i nihči nam več nigdar triebal nebu povedati kaj h življenju trieba – vsaki te med nami unda mam bu i znal.