V prošlom broju Zagorskoga lista čitam kak Zagorje nema kamp. To je točne, pravi kamp nema, ima jeden izviđački ispod Ivančice, ali to je daleke od kampa kakev bi se mogel ponuditi večine denešnjih turista. No, kamp nije jedine kaj Zagorje nema, a tiče se turističke ponude.

Mi bi šteli da nam je Zagorje čiste, da ima čim menje industrije, da prodajeme pogled z naših ljepih bregov, naše domače specijalitete, suvenire, tradicionalne proizvode ovoga kraja, dobre vine itd. To moreme najbolje prodati na našem domačem terenu.

Kad turisti dojdeju k nam na odmor onda im ne bu teške prodati one kaj Zagorje ima i kaj vredi. Položaj nam je idealen, blizina velikoga grada, dobra prometna povezanost prema van i prema ostatku Hrvatske.

Pa de je onda problem? Zakaj mi ne vrcame lovu od turizma kad imame se kaj drugi nemaju?!

Problem je v pristupu, v organizacije, v promocije, koordinacije, drugim rečima zakazal nam je ljudski faktor. V Zaboku čak postoji i faks za Turistički menadžment, znači da imame i svoje školovane kadrove, ali opet nemame rezultate.

Turizam nije jednostavne zorganizirati i to se ne da napraviti prek noči, ali da bi mi pune više po tom pitanju morali poduzeti to je semi jasne. De su obilježene biciklističke steze? Da li doj pomaže planinarem da urediju planinarske steze i zaklone? Pitanja ima pune, a odgovore male.

Pune se govori kak Zagorje ima vinske ceste, ali ja još nisam videl da ijedna od tih cesti funkcionira, a organiziranje ponude po takvi ruta dužnost je onih koji se z razvojem turizma baviju. Organizirati turističku ponudu tera več postoji po Zagorju, osigurati promociju, reklamu, PR, se je to posel Turističke zajednice i ureda.

No, za njihove se akcije ne zna. Deliti letke i prospekte nije nivo stručnjaka v turizmu. Ake se kaj i dela to nema odjeka v javnosti, a onda slaba vajda od takvoga posla.

Županija je rekla da nam je turizam strateška privredna orijentacija. Ali onda za njegov razvoj treba dati lovu, a oni koji delaju po turistički uredi trebaju dati programe koji buju tu granu unapredili. Turističku zajednicu i urede treba dobre financirati, ali i deti im obavezu da moraju napraviti nekakve rezultate. Ko ne zadovolji nije za taj posel.

Ima nas pojedince koji sme spremni pomoči da se Zagorje promovira, koji sme spremni i akcije poduzimati po tom pitanju i to zabadava, ali onda bi i oni koji na konto turizma primaju plaču trebali nekaj napraviti, a ne da čekaju penzije po turistički uredi na račun onih koji su v turizam uložili svoj rad, svoje peneze, svoje vreme i rizik da li buju vu tom poslu uspeli.

Naše glavne turističke manifestacije još su navek prvi glasi, sajmi vina, fašničke povorke, igrajte nam mužikaši, dani kajkavskih reči, tjedni kulture, branja grozdja, proščenja… To su osmislili i pokrenuli ljudi koji su več v penzije, a mnogi, na žalost, več i v grobu. Od novih se manifestacija morem zmisliti glumačkoga festivala, viteškoga turnira ili nekih festivale mužike koju ne poslušam.

Ljetes je i Zagorski list nastavil akciju, koju su prije toga delale zagorske radio stanice, animacije po ostatku naših toplic.

Koju su manifestaciju ili akciju pokrenuli oni koji delaju v turističke zajednice ili po turistički uredi?

Jake bi bil vesel kad bi na ovu tvrdnju reagirali ogorčeni turistički činovniki i demantirali me z dokazem kak sam pisal gluposti jer to nije točne. Dakle demantije čekam i objavili ih bume na istomu mestu!