Piše: mr.sc. Rajko Fureš dr. med.

Kaj buju nam tie dragi pajdaši denes ili zutra priredili, gda več jela i pila nebu, gda peneze vse buju nam rastepli kakti zanas, kakti da za vse nas skup veseljiče napraviju najvekše. Zname dobre, a i navek se dobre te znale da se ideme igrati i da kruha ljudme trieba dati – unda gda vse je naopak krenule. Tak i prie kratkoga cajta, gda se je pri nas mogle za unami kaj največ im trieba – i nadeljiti, gda im se mogle vse te skup i rasprestrieti, gda se mnogomu mogle veselje poslati, a same se za par želuce vse te napravile i h žepe fljetne pospravile. Tie dnev se je kazal dugi cajt, dok su nam povedali da bume h mestu dobili nekaj lepoga, veseloga i zelenoga, a na kraju zišle je čiste gole i z betonem spresvlječene. Gdoj se zate boril i komu je te triebale, otom nie trieba nič govoriti – jer vse tuj se razme predobre, jer kak su penezeki najdrajši h igre bili, za razmeti je da nie niti za žaliti nektere tam mulčeke kaj su bez glav ostali.

Te vsemi trieba povedati, a na prvomu mestu unami kaj te videli niesi, da prešecija ta bila je do zdaj najlepša, da lepše mogli do zdaj videti niesme. Da te veliki dnev je triebal za vse nas skup biti, te iste tak stoji, da je vse te bile unak kak nekteri su šteli – i te je za priznati, lepe se je vse sporihtale, drevljiče prek noči zrušile, vse skup h betonek se spospravile, pak je vse te skup i zišle tak kak ziti je i triebale. Išle je morti negdar male i drugač nek su nekteri pajdaši šteli, jer navek življenje nam donese nektere putece za tere niesme niti znati mogli da ih na svietu i ma. Tak ti ne dojde nič druge nek da se zmisljiš kak pajdaši su ti povedali da vse delaju same da drugami bolše bi bile, a denes te nemreju videti, ne zate kaj nekaj si im krivoga napravil nek zate kaj se svojeh reči držali niesu.

Te kaj nekteri ne verjeju k njihove da nebi zeli niti une kaj pod noktekem im – te nie niti za verovati, jer kak se takvami pajdaši verovale nebi, na prvomu mestu ak se svoje reči tak držiju. Nemreš verovati da nekaj ne jemput poveju i obečaju  -  a unda pak napraviju čist naopak. I gda se i te dogodi vsikud povedaju kak su uni veliku žrtvu pretrpeli, kak su uni bogi, kak si uni nič niesu zeli, kak vsi su drugi mrčnjaki i naopačnjaki tere trieba je hništiti. Človek se unda same more pitati – a gdo je tuj, h vsemu skup naopak nasajen, e te zaistinu tak je, jer nič niti ti nemre dojti praf praf – jer dopovedati si nemreš kakef te človek ili ljudi moreju biti, kaj do hčera si zanje mislil da bolšeh na svietu ih nie, a denes su ti se na nekaj čist drugačkoga spremandurili.

Zdaj več i nie vriedne si stepavati z glavu, nie se vriedne igrati z nekterami tam kaj pred vsemi šteli bi ziti kak unie od tereh pametnejšeh nie h uoveh krajeh, jer dobre ti poznate je te da se pri nas furt i furt jedne te iste čujti more, pak iste tak nihči nie tak pameten kak te su unie teri za nas krmaniju, još od prie skore šezdeset ljet. Kak da pri nas vrieme stale je, kak da nič se dogodile nie.

I misliju si nekteri nam pajdaši da vse se pozabile bu, ak se ljudi bu nadeljile z pivicu, čvapi i klobasami, ak im se bu još nekaj morti i povedale, kaj bu huti im cajt ljepe i za posluhnuti, vsaki si zaistinu te bi i misljil. A ljudi kak ljudi, več istu večer, čem im želuci več puni neju, mam buju išli vse une najsvetečnejše kleti, mam pozabili buju na vse une kaj se male prie pripetile. Unda bu pred vsemi zišle na oči vse te kaj do male prie niesu videli, i betonček i zidek i te da drevljiča nie, a još bolj bu zišle te da nebuju si mogli odgovoriti – a kam tie brehčeg penezekeh završil je, a do male prie niesu nič druge delali nek na vse vuhe kričali od vseljiča.

A gde su penezeki završili, gdo te zna, e se kaj more pametnoga zeznati z toga da se za tem bi išle – i te je iste tak pitanje kaj same jednoga odgovora ma, a odgovor veli da su penezeki h veter več prešli – pak niti nie vriedne za njimi iti, jer gdo je videl da se veter igdar hlovil je. Da se more nekaj druge povedati, poklje jela i pila, te je nekaj kaj morti nekteri med nami i bi, ali kak se veli – tuj se nič povedati neda, jer bolše bi bile da se več ne stihče nigde drugde nek same unde gde se more dobiti prava pamet h prave vrieme. A da se poklje jela i pila bolšu pamet meti more – te je nekaj kaj štel čujti bi i sprobati vsaki bi med nami!