Piše: mr.sc. Rajko Fureš dr. med.

Gde si pajdaš, dok se nate zmišljavam, a tebe mi nie?! Gde si pajdaš dok vsi popevaju, dok veseliju se, dok veselje vsemi na ličeka se vidi, gde si zdaj pajdaš naš najdrajši?! Popevku štel bi posluhnuti, za vse na svietu, za vsakoga pajdaše, za detece najmenjše, popevku štel bi da vsi skup popevame – da vsemi bolše bile bi. Jeden dnev tak morti je i prešel okol, jeden dnev morti se je i hveznul, ali vsaki dnev takev biti nemre, jer jeden dnev nie nigdar drugaček bil nek se je obrnule. Poglej sim i tam, poglej po malu i potihe povej, videl buš strnišče kaj niesi ga tulike lete videl, videl buš putec i pajdaše stare, videl buš vse kaj senjal si tulike lete, kaj drugač nie mogle niti biti.

Nie same tak prejti med betvami i porihtati si kukmu, nie same tak dodelati nekaj kaj se neda dodelati, a nie same tak niti otpeljati se daljeke, na vse pozabiti i od vsega pobeči. Kak god da štel bi unda poljek biti, gda štel bi se zvlječi od toga da nekaj bi i povedati se triebale, navek prie ili kesnejše ti došle bu da zbeči neš mogel, da povedati moral buš kaj češ. I gda te vabiju nekteri tam da povedati mam moral bi e si črni ili beli, e buš se hitil na ovu ili na unu stran, ti temi dragami „pajdaši“ nikak rastumačiti nemreš da nie same tak stati se bile kam, da nie same tak gda nekomum pleče obrneš, jer navek kak god da napravil buš – nekteri se bu našel teri povedal bu da niesi praf napravil. I tak prejde vrieme, i tak prejde doba, i tak se obrne vse une kaj se obrnuti je triebale, a nie se tak triebale dogoditi, kak god da se je to dogodile.

I unda kaj povedati sam sebe gda neznaš kaj bi povedal, kak se vladati unda gda neznaš kaj bi napravil, kam iti unda gda neznaš teri putec zebrati, vse te najgorše ti je kaj mogle ti se je dogoditi, a pomoči si nemreš. Najgorše ti iste tak je gda od dvie zločice vekšu zločicu zebrati moraš, gda se moraš obrnuti nekam kam niti nebi morti štel, a pomoči si nemreš, ili si morti i moreš pomoči, kak god da se te videle tak kak se videle.

Tak ti vse te zide da najgorše i najžmekšejše ti h življenju nekaj je zebrati. Negdar gda najbolj te ti zgledi tak kak triebale ti i nie, gda se nemreš niti obrnuti a da te nehči ne pogleda naopak, unda ti se tak niti nie za začuditi kaj te je hpičile une za kaj si se nadal da nigdar te nebu.

Negdar sam sebe dopovedati nemreš kaj te z tobu je, negdar ti žal je – pak nemreš nič sam sebe, a pak nie te same tak da se povedati trieba a ne pove se. Življenje negdar i ne zide tak kak ziti triebale bi, življenje se navek i zbrkne unak kak se najmenj vsaki med nami te nada – pak je jedine kaj se unda da povedati – te da ga se zastanoviti neda. A kaj se nove zmisljiti da unda gda nemreš ili neznaš kaj se bi napraviti triebale, e vse te je vriedne da se obrne une kaj se obrnuti triebale već od negdar, jer kaj druge napraviti nek z glavu same stepsti, unda gda več neznaš niti kaj i kam z sobu bi.

I unda gda ljehke vsemi nam skup nie, i unda gda se čeme obrnuti, i unda gda sme na mestu ostali jer nezname kam z sobu bi, vse jedne – pri ili kesnejše postati morame, počinuti i i pak znović si o vsemu tomu skup spregruntati. Zate vse te skup nie ljehke, zate vsikud je trieba otprieti zaprete ljese, vsikud i vsigde trieba je dobre se obrnuti i dobre si spreštuderati, jer nigdar ljehke nie a niti je igdar ljehke bile. Kak god da tak te mnogi put i zabluditi bi štele, kak god da se če pospominati tak kak nič ti nie za razmeti, vse te skup drugač niti bile nie a niti more biti nek tak kak sam si napravil buš. Zate ti na zemljice trieba je biti, zate ti trieba je dobre se postaviti i dobre si gruntati, jer same tak, ak nam pomogel bu Božek naš najdrajši, mogli bume se na noge zdignuti i tak ostati, kak deca najbolša, deca tera navek fala buju znala povedati.