Piše: mr.sc. Rajko Fureš dr. med.

Sveklji gumb morti i nie tak sveklji kak si nekteri šteli bi. Denes dok nam se mnogi pajdaši, kaj još do hčera pred vsemi mogli su sezakleti kak za zvezdicu nejčrlenejšu najvrednejše je i življenje dati, denes su se i tie pajdaši mam sprekolubitnuli. Do hčera su na prvomu im mestu pajdaši bili, još je točnejše otom povedati te kak delale se o radnikami, selaki, mladami, slobodne inteligencije i proleteri – kak najvrednejšemi kaj pri nas se najti more.

Tie naši pajdaši pred vsemi i vsemi povedali su da jedine trieba za drugoga dober biti, da trieba je vse kak po bratski deliti, da jednaki kak brati triebame se složiti i hložiti. I denes im je zvezdica najčrlenejša h srčeku i na srčeku, a denes pak več ne povedaju otom kak vsi bi jednaki i brati biti triebali, denes su im nektere druge vrednosti na pameti. O terami se vriednosti dela vsi dobre te znati moreme, a dela se o tom da denes nemreš razliku videti med unami teri su se do hčera za črlene držali i uneh kaj su nam se h kapitaliste mam hitili. Vsi uni skup su počeli delati unak kak ih unie pajdaš z bradu zvučil je i delati, tak da toga maloga človeka hništavaju i do zajdnjoga ga stepavljeju – da več nigdar pravi nemre biti, da bi im za droptinje z ruke laziti mogli kak peseki.

Tie jedni i drugi pajdaši denes nam skup kole vodiju, jer nie drugač moči za razmeti kaj te ih je na jemput skup dele – kak najvekše pajdaše, a vsemi kaj nekaj razmeju nie trieba niti preveč povedati kaj na stvari je – a te druge nemre biti nek same penezeki najdrajši. Kak da pajdaši pune ih maju, iste tak im nigdar dost nie, nie im nigdar nič druge na pameti, nek same te da čem vekši kupček penez bi im trieba na prvomu mestu biti. Penezeki najdrajši, vse su i jedine su čemu se klanjaju tie dragi pajdaši. Pozabili su i na Jezušeka, Božeka najdrajšega, Majčicu jedinu i h Duha presvetoga, jer za jedine su si zebrali – penezeke najmilejše.

Svekli gumbek negdar bil je une kaj triebale vsemi je povedati je da prejeftine se je nekaj prodale ili bolj reči poklonile, ak se te delale o pajdašami, nekterami vriednami stvari, zemljice, ili vsemu kaj največ vriedi, a na kraju najbolji i kaj se poštenja dotikavlje. Denes svekli gumb postal je još več i još bolj sveklejši, denes vse une za kaj ga se prie mogle jeftine dobiti, još je bolj postale – tak da denes nie ti trieba nič pune, a da buš si ga si pribermal. Tie pajdaši kaj do hčera su se pred zvezdicu zaklinjali denes su se h gospodarstvenike najuglednejše mam išli se sprekolubitnuti. A da bi se mogele h tajkuneka najmodernejšega mam spremanduriti, a trieba ti je najnovejša i najvekša ljetričica, velike stanje i pune penez, unda dojdeme do toga da vse te ak meti češ nekaj triebaš hložiti – a kaj ti je hložiti najlježejše nek lucke.

Lucke ti je navek najmilejše bile, još od unda gda druge si vučil da bi si brati i kak brati biti triebali, da bi vsemi jednak triebale biti, več si se unda na pravoga puta mogel hitati, da bi mogel postati te kaj denes si – najvekši i najuglednejši gospodarstvenik. A denes, kak delaš i kaj delaš – te je nekaj kaj vsemi kak primera pokazati mogli bi, te je une kaj poveda i kaj same jedne razme – a te penezeki su.  Svekli gumbek, kak god da te kak detece mami, nie une za kaj vse triebale bi ne same sprodati – nek spokloniti. Tie gumek morti bi i mogel biti nekaj z čem se bi mogle mutiti, a da je nekaj druge moči ž njem napraviti pametnejšega, te je nekaj kaj nie nam drugač moči delati.

Kak god da javne su se zvezdice odrekli, još ju navek tie najdrajši nam pajdaši husebe čuvaju kak vriednost najvekšu, ali iste tak nebi za nič dali vse te kaj su si prek noči sprebermali, tak da je naša jedina domaja denes sprodana, denes boga, tak da nam se radi gumbeka najsvetlejšoga i penezeke najmilejše, nami i dece naše – dobre ne piše. A une kaj vsemi nami nam bi kak utjehica najvekša triebale biti – je te da Najvekši vse te vidi. Nič druge nie trieba, a te nie ljehke, trieba je pravi biti, pravi i jedini pajdaš. Te trieba je, a da ljehke te i nie – nie. Da se iste tak te mam i ne splati, ali da se po času splati - splati se, same da zdržati je trieba i da te najtežejše je - je.