Piše: mr.sc. Rajko Fureš dr. med.

Denes gda si sedim i gda se probam spamtiti kaj je te kaj vse nas je skup na kupu držale?! Kak god da štel bi nekaj druge povedati i napraviti, iste tak nas vse te skup male po male otpira i naopak obrača, kak god da si misljime vse te skup i male drugač. Te kaj nie se mogle do hčera niti zagledati, kaj se nie mogle niti senjati, vse te denes pred nami stoji i piče nas – kak nekaj kaj vriedne je bile da nas hpiči. I čem se bi prie mogli otprieti, čem bi se bolj mogli pred ljudmi kazati, iste tak nam i vse te skup nebu bile dost da se htopime i hgrezneme unak kak se nie te triebale nigdar niti dogoditi.

Kak god da sme si morti i misljili da je moči nekaj kaj nie do hčera moči bile, iste tak nam vsemi skup trieba navek na pameti biti i te da nie se trieba preveč hitati h zrak, jer ak preveč negdar i češ postati, iste tak ti dogoditi se more – da se bi na tomu putu čiste ljehke i popiknuti mogel. Vrieme je vrieme, navek takve da žnjem nigdar se nezna. Vrieme nie vrieme potom kaj ide nek potom kaj nigdar nemreš ga hloviti, a te nekteri med nami nečeju si dati dopovedati.

Gda se počne kazati svekljinica i gda tak pred vsemi bi štela male se otprieti, kak sveklina najjakšejša, iste tak nam i vse te druge skup nemre niti drugač biti – nek same tak kak je, a mnogi put te tak i nie. Da rieč je drugač moči najti, da ž nju se more nekak drugač pospominati, da se more vrnuti vrieme – vse bi morti se i zmeniti dale. Ali vrieme, kak vrieme, navek nam vujde gda misljiti sme počeli da sme si ga zase zeli, navek nam pobegne i pleče nam kaže, tak da nič druge niti nie za otprieti nek same nove vrace da veter poslek more si bolše zbaviti. I gda ti i te tak se kaže, gda več sam sebe dopovedati nemreš – da nie moči, da nie smeti, da nie same tak šteti – unda je same jedne kaj se šika, a te je same jedne kaj napraviti se more – da se postane i male zgrunta. Unda gda si si sam sebe dopovedati štel – da moči ti nie napre, da nie se vriedene boriti, da vse več prie je zacajhane, unda ak več nič nemreš ili nečeš napraviti – same probaj male posluhnuti, same male postani i morti buš za teri cajt male bolše videti mogel. 

Da negdar i nekaj povedati trieba – te tak je kak je! Morti nekteri i ne misliju tak, morti i negdar nie same tak povedati – te vsaki med nami najbolše zna, ali une kaj je najjasnejše h vsake dobe – je te da trieba male pogledati vsikud i male dalše. Da nie dobre furt gda se same gledi tak kak te nie trieba, da nie najbolše unda gda se če a nemre se i da nie najbolše gda se neče a triebale bi – te največ put zezname unda gda več vsemi nami kesne je. Pomalu sme se sami negdar i pospominati šteli nekteri put z nekterai tam ljudmi teri su nam triebali biti male drajši, ali unak kak se furt poveda – navek vse te skup ne zide tak kak sme te si šteli. Morti je a morti i nie dobre unda gda vse te skup šteli znati bi, ali kak se veli te tak je i drugač niti biti nemre, jer jedine kaj h življenju se more prijeti čem glibšejše – te je jeden cvetek teri te razžariti more, nič druge i nič drugač.

Kak doba je ta preduga, kak nezna niti nič otom kaj je bile, kaj je i kaj morti jednoga cajta i bu, iste tak vse te skup ziti more nekak drugač i otprieti more same na jedne vrace, tak da nihči nebu več mogel povedati da nie morti une prie ili male kesnejše praf bile. A reči kak reči, negda gda štel bi da ih najdeš - najti ih nemreš. Negda pak gda štel bi da nie ih -  une same laziju potebe i mira ti nedaju. Te življenje je kaj dopovedati si nič več neda, kaj štele bi same da te obrne unak kak morti si i niesi spremišljaval da hpiknuti te mogle bi. A kaj buš i bi o vsemu tomu unda povedal, kaj vsemi bi štel reči dok z očmi iščeš, dok štel bi ih pogledati h uoči, a nikak nie ti moči ih najti.

Tak, kak god buš iskal, kak god da ti se vse te skup bu i vsikud sprekolubitnule, kak god da sam sebe iskal buš, vse te skup more ti same na pravu stran ziti ak buš se poklonil i ak buš molitvicu zmoljil, zase i za vse une kaj znal si.

Tek buš unda mogel znati da reči nejdeju same h veter...