Pri nas je prije par dane počele blagostanje. Nišči više ne pita za plače, stanje kriminala, cene benzina. Nogomet je tema broj jeden. Hrvatske zastavice kačiju se po šajbami aute da si znaju da taj auto vozi ponosni hrvatski mužič. To kaj su auti stari u proseku oko 15 ljet  dokaz je da su vlasniki prije sega domoljubi, a ne materijalisti. Z druge strani kad več nemaju za pristojni životni standard i novi auto barem imaju za zastavicu uz teru su dobili i novine.

Nacionalni ponos nadoknadil bu se one kaj ljudi nemaju. Mi sme nacija koja je vajna zastavami. Kad nešči zamahne zastavu počinje kolektivna amnezija. Zastava izaziva kolektivnu nacionalnu hipnozu.

Kad naši lopovi očeju da ih se ne dira počneju mahati zastavami i odma postajeju domoljubi. Nakon kaj su naši nogometaši odigrali prvu utakmicu izjavu za hrvacke pučane dal je precednik Vlade. Kakve on ima veze z nogometem?! Pa baš je to prilika da ga nešči nekaj posluhne. Ljude ne zanima kak bu rešene pitanje ekonomske krize, kak smanjiti nezaposlenost, kak stati na kraj korupcije. To su teške teme, doj bi se s tem štel zamarati!? To bu nam ionak rešila Evropa kad joj se uspijeme prikrpati. Ali kad bu nam premijer rekel nekaj u vezi z nogometem to buju si poslušali.

Ljudi nečeju da ih se maltretira s problemi. Nogomet je baš zate privlačna tema jer v nogometu se uspeh postigne relativne jednostavne, treba same dati jen gol više od protivnika.
Naši su igrači najbolji na svetu jer ih veliki broj igra vane. To kaj i igrači z drugih državi igraju vane nema veze, jer mi poslušame same to kakve su uspehe ili doprinose uspehem dali naši, kak da drugi nisu ni igrali. Kad pobedi strani klub v terom igra naš igrač onda poslušame same one kaj je naš doprinesel, ko da drugih deset nije ni igrale na te utakmice. Ali na ovomu takmičenju, na žalost pojavile se bu i tih drugih deset, a mi se bume čudili kak ti poluanonimusi moreju nekaj najbolje reprezentacije na svetu. A da su naši najbolji to zname si i bez da odigraju koju utakmicu. Čak i kad bi zgubili to bi bile zate jer ih je sudec ili loša sreča zaskočila..

Navek je ljepše kad uspehe postiže nešči drugi, a mi pred televizorem moreme reči da je to naš uspeh, makar nam je največi doprinos tomu bil kaj sme spili teru pivu uz put.

Bile bi dobre kad se dižeju cene benzina ili struje na računu štampati i naš grb, zastavu i sliku naše nogometne reprezentacije. Kolike god da se povečaju cene ljudi bi bili zadovoljni jer bi na istom papiru vidli one teri ih z jednu utakmicu moreju osloboditi krize. Ne na način da im materijalne pomoreju, nek da gledajuči nogomet i nacionalna obilježja pozabiju v kakvom su dreku.

Ima i onih teri ne mašeju z zastavami, teri za zastavu delaju, ali se ne zanosiju da bu njihove probleme rešil nešči drugi, bez obzira s teru zastavu mahal. To su antidržavni elementi. Jer se naša država ne zasniva na radu, poštenju i moralu, nek na zastave, himne, pljačke i korupcije.
Z zastavu bi trebali mahati zate jer sme na svoje rezultate ponosni, a ne zate da bi bili ponosni na mahanje z zastavu.