Piše: mr.sc. Rajko Fureš dr. med.

Une kaj na prvom mestu triebale bi nam biti, a nie, vse te je zišle i zišle bu ovak ili unak tak kak nie se mogle nič napraviti. I gda se loviti počneš za nekaj trdoga i čvrstoga, vse ti hutebe poveda da triebaš več jemput povedati kaj na prvom ti mestu triebale bi biti. Da jedne povedaš a druge delaš i morti na nekaj i nekaj trejte si spremišljavaš, te je nekaj kaj nie – „dragi pajdaš“, za razmeti. Morti bu tie rekel da nie znal ili razmel, ali kak se veli življenje svoje putece ma i zmišlja navek nekaj novoga.

Unda gda povedaš da nehči te nekam del, a da ti te štel niesi i da si niesi mogel pomoči, jer vse kaj si delal – kak vsemi povedaš, delal si da drugami bi pomogel, a nigdar ti na pameti nie bile te da zase bi nekaj zel, vse te skup tak ti zišle je da nihči te več razmel nebu kaj te ti povedaš i kaj te štel ljudmi bi rastumačiti. Unda bogček niti sam razmeti več mogel neš – zakaj nihči več ne verje ti. Pak tak gda ti pajdaši čeju i pomoči, gda ti bi povedati šteli da nie te hvredu, tebe se mam nosek obesi, jer mam ti se kak svetečne obrača te kak nie nič vriedne bile, a vse si delal same da drugami pomoreš. Unda gda pak ne posluhneš i gda pak po svojem napraviš, a drugač se je dogovorile, unda navek i furt su vsi skup drugi naopačni i mam si sam od sebe napraviti štel unoga kaj najvekši mučenik na svietu je.

Tak, gda najdeš se bljizu, gda se mešati nebi štel, a dobre ti poznate je da nekteri tam pajdaši su povedali ti te kaj su povedali, unda moreš same povedati da za vse une kaj su i povedali – njih i spitavati trieba, da poveju kaj z tem povedati su šteli i kaj je te triebale biti. Kaj te je – same te tie nam „najdrajši pajdaši“ i znati najbolj bi triebali, nihči te meste njih Vam rastumačiti tak dobre niti nemre.

A ak bume vsi skup šteli zeznati kuljike te zaistinu bi triebale i ziti, gdo te bu triebal i z svojega žepeka platiti, kak i do zdaj – teške da se igdar bu te zeznati mogle. Unda bi morti nehči štel spitavati zakaj nie na vrieme se počele delati, tak da se tak napravile – denes bi tak bile da nihči nič nebi reči mogel. Gda nehči pita te kaj se te trieba dogoditi i zakaj se bi triebale popevati, unda gda pogledaš kaj se je dogodile – a nie triebale, vse ti te skup dojde tak da se bi plakal. Unda gda plačić sebe pogledaš h špigljeku – prve kaj dojde ti do pameti je je te da sam sebe spitavati počneš, spitavati otom kaj vse te skup ti triebale je i kam se bu hložile te kaj se je pribermale, a pribermale se je toga čude.

Da premuder vsaki med nami triebal bi biti, da si bi mogel vse na svietu rastumačiti, spregledati da triebal bi vsaku dobu jer drugač niti moči nie nič h življenju napraviti – vse te na iste ti dojde, jer drugač niti moči ziti nie. Tak vse ti te ide da najemput pred očmi ti se razdenile, tak da mogel si videti te da i druga ma stran, stran teru do zdej niesi videti mogel, jer pak vseh uneh pedeset ljet i vseh uneh pesmic i parolic – i den denes se spozabile nie, vse te i den denes živi, a več odavne te triebale nie.

Gda se češ zestati male z unem kaj bi triebale biti nekak i pametnejše, gda štel bi da več h srčeku mesta maš, da niesi od zdaj več nikomu strahu – jer te niti smeti ti nie, unda ti vrieme je da zastanoviš se i oko sebe se zgledaš. Da drugač bi nekaj napravil od unoga kaj si do zdaj delal i da štel bi da se zmeni, vse te te navek spreobrača, tak da se male ti i h glave zavrti, ali une kaj je jedine – je te da jedine kaj je trieba za zutra ostaviti, te srčeke je človeka, človeka kaj za vse skup mesta ma. Dok se šteli vsi skup bi male zmeniti na bolj, dok šteli bi morti i nekaj oddelati poštene, vse ti se bu mam otprle dok poslušaš stare domače popevke, dok ti spremudre se poveda, a ti poslušaš kak jedine bi i triebal – da kugla i kolajna skore furt krivoga pogodiju.