Ova poskupljenja nafte i njezinih derivate nekteri nazivaju dramatičnim. Ugrožena nam je egzistencija, teške bu preživeti… Saki dan gledim kolone aute, po naši mestima su gužve, nema mesta za parkiranje, z motori juriju po cestami. Zbilja drama! Nema se za kruh, ali za benzin bu!
Ljudi su se tolike navadili na aute i ostalu tehniku da im šparanje na potrošnje benzina zgleda ko smak sveta.
Celu mladost vozil sam se z cugem, autobusem ili z becikljinem. Točne da se v denešnjem tempu pune stvari ne bi stigle napraviti bez upotrebe auta, ali mi sme se navadili z auti i na zahod iti. V razvijene Evrope ljudi se masovne voziju z becikljini. Naše ljude kak da je sram sesti na becikljin. Oni, pak, teri se očeju peljati na nožni pogon v strahu su da ih kakev manijak ne pregazi. Kak dete sam z becikljinem saki dan išel v školu, a i v slobodne vreme največ sme bili na becikljinu. Denes svoju decu ne bi pustil ni da po nogostupu hodiju sami da ih nešči ne pobere. Deci se kupujeju motori i skuteri, tak da se moreju iživljavati po ceste. Policija iza grmlja nabija normu, a divljaki po naseljenim mestima sprobavaju kolike im moreju iti auti i motori.
I ljudi se sekiraju kaj bu benzin poskupel! Pa naj poskupi! Smanjil se bu promet, zagađenje, biciklisti buju mogli na cestu bez straha.
V semu treba gledeti pozitivnu stran. Treba se zmisliti i onoga štrajka potrošače. Pune toga kaj kupujeme nam ne treba. Ne morame za saku glupost iti v dučan. Ne morame za saku glupost paliti auto. Njive su nam zapuščene v dračju jer nam se nič ne splati sejati. Sad kad bu zbog skupe nafte poskupel kruh i ostala prehrana merti bu nam se več splatile njive sejati, merti bume doma pekli jeftineši kruh.
Velika je prednost nas v Zgorju kaj još nisme su prirodu vništili pak se na neke moreme osloniti. Oko nas su plodne njive, zeleni gaji i trnaci, trsja i bregi. Niti morame kam daleke iti da bi uživali v prirode, niti za najbolje stvari nekomu morame plačati velike peneze. Se je tu oko nas i ljepota i zdrava hrana i čisti zrak. Trebame same male volje i reda da skoristime svoje prednosti. A za one male benzina kaj bume morali kupiti bu se našle.