Piše: mr.sc. Rajko Fureš dr. med.

Nikak za razmeti ti moči nie -  e te moči je da nekteri kaj med nami živiju zmenuli se niesu, kak da zanje vrieme se zastanovile, kak da još su tam od gde su genuli. Zname da vse su tie dragi pajdaši delali da bi nam pokazali da Božeka i Jezušeka nie, zname dobre da su mnogi med nami radi Jezušeka najdrajšega h življenju mnoge zločice sprebavili, ali da nigdar nie nikomu med nami niti najmenj žal bile. Da pak nas vse skup nehči pita – e kaj zmelili bi, e morti bi odhitili Jezušeka i Bogeka najvekšega, sigurne je une kaj jedine nam je moči i kaj jedine nam povedati je trieba – a te je te da nigdar niesme, a niti bume drugoga puteca meli.

Jedini putec za navek nam je i bu same Jezušekov putec. A pajdaši teri su do ščera hništavali vse une kaj križek na sebe je mele, kaj su mnoge radi toga i gnjeli, zločicu im h življenju delali, pak da ne povedam vse une kaj su kak najvekše zločice su delali, tie dragi pajdaši denes su se prekolubitnuli. A da je bolj reči da su se spreobljekli nek da su se sprimirili – i te istinica je vekša jer da same ih pogledaš – te drage pajdaše, da same male ih glediš kaj denes delaju i gda se zmisljiš kaj do hčera su delali, mam nič ni nebi bile ti i vsemi nami najjasnejše.

Nigdar nič nie se bolj videti moči i povedati otom kaj je i gdo je nekteri med nami, dok nie došle do toga da lafre su zginule i pajdašem temi pale. Retki med nami po istine povedaju, retki moreju i sami sebe dopovedati da zabludeli su, retki pred vsemi moreju povedati da niesu dobre delali – da žal im je. Te najtežejše je, te nemre vsaki med nami, najgorše je ak več nemreš nič druge, da pred vsemi a i pred sobu povedaš – da najbolji si, najpametnejši i najfljetnejši.

Unda gda mnogi bi pred nami šteli i povedati kak tie pajdaši su jake dobri, kak su najemput i mili postali, iste tak nekak h čoveku kak da vse te skup se spretrgne, kak da če se otprieti i kak da če vsemi skup povedati kak nekaj vsejedne hvredu nie.

A da hvredu nie te da unie teri je do hčera vse nas skup gnjeli, kaj dihati nam dali niesu, da tie nam dragi pajdaši denes vsemi šteli bi braceki biti.

Da nas Jezušek vuči da triebame ljubiti vse une kaj zločicu su nam delali i šteli – te iste je tak istina, ali človeku nie same tak i nie vse jedne gda te drage pajdaše gledi kak delaju se da nič se dogodile nie i da su najbolši bili a i da najbolši su. Još gorše ti je gda tie dragi pajdaši kaj su navek figu h žepu držali – denes se postaviljaju tak kak da greha nasebe nemaju i kak da ga nigdar meli niesu, jer najtežejše je povedati da h življenju si pogrešil. Da vsaki zabludeti more, da skrenuti nie niti žmehke, da se najtežejše na pravoga puta vrnuti – te je une kaj dobre bi nam poznate triebale biti. Same je najvekša stvar une kaj nie same tak napraviti – a te je klečečki pred Jezušeka stati, povedati mu da žal ti je za vse une kaj si drugami kak zločicu napravil, da štel bi se na pravu stran obrnuti i da štel bi krenuti tam gde je i trieba.

Tie dragi pajdaši, kak god da su si drugačke kaputeke spreobljekli, kak god da šteli bi nekaj povedati vsemi na svietu otom kak najbolši su, tie dragi pajdaši nečeju se spamtiti da nehči vsejedne se zmislji toga kak su do hčera vladali se i gdo su uni praf za praf. Da te stranjske školice, kaj nie ih mogel gdo god završiti, i den denes su im na prvomu mestu, i da se i dalše vladaju kak unie kukčeki kaj farbice radi zmeniju, i te je iste tak vsemi nami najjasnejše triebale bi biti. I kak god da vrieme ide i kak god da se negdar i če povedati nekaj drugač – navek im zide zvan farbica tera dobre je poznata.

A da temi najdrajšemi pajdašeki iste tak pobegne, da nemreju se furt kak gosponi držati – i te vam se dogoditi more, na prvomu mestu unda gda nie im več same tak moči druge posluhnuti, jer navek bi šteli da vse je tak kak unie bi šteli, jer drugač niti nigdar nahčeni bili niesu. I po očmi teh dragek pajdašeh hutom času videti najbolj je moči da najrajši tie dragi pajdaši, da te moreju i denes, zelji bi pak pendrečece h ruke i ljudi tuklji – kak su ih do hčera, a zdej bogci kaj moreju – moreju te da im od jada z zubeh same penica ide. Da lafre su vsemi pale, a več je vrieme bile, te je nekaj kaj i nie pre loše, jer bar znale se bu da vrieme je prešle a zločica navek zločica bu ostala, nikak drugač, kak god da farbicu je zmenila.