Piše: mr.sc. Rajko Fureš dr. med.

Zakaj bi i mi bedasti biti triebali, e sme se hčera narodili, pak sme i videli une kaj su male pametnejši delali, a tie su male več sveta sprešli. Unda sme si tak spremišljavali, gda več tie naši pametni pajdaši zubljaju, zakaj i mi zubljali nebi, gda nam se več priljikica kaže, jer je pitanje e bume več priljikicu igdar meli. Unda ti i nie za začuditi se ak se nate zija kaj si mulec i bedak i kak ne razmeš, da same je trieba pravoga se posla prijeti, da moreš kak bogec ciele življenje od jutra do zutra delati pak nigdar mel neš nič. Ak se praf vladati znaš, ak si zubačice praf pririhtaš, unda straha zate nie, unda si nekaj moreš i nazubljati. Ak si pak mulček, ak zubljati neznaš unda niti si kaj buš nazubljal, niti kaj buš mel, tak ti tie dragi pajdaši povedaju.

A e te je zaistinu tak kak je, a e te tak trieba biti – i otom se moreme i morame drugač spominati. Jer vse h življenju nie ti te da rit ti puta videti trieba, nie vse h življenju te da same sebe namečeš i pribermaš, trieba je vsemi dati da živiju, trieba je vsemi male zraka dati, jer niti si sam na svetu a niti ti jedini želučeka maš. Kak god da je lepe da rit ti puta vidi, kak god da ti smisel življenjski more biti da si dugše tuj gde lepše je, kak god si misliš da tak ti zanavek biti trieba, po druge strani nesmeš si h glavu zabiti da za navek buš i da navek ti bu išle tak kak ide ti.

I dok nehči h žep štel ti porinuti bi nekaj kaj vsaki rad bi priel, ti kak “mulec” od sebe tiraš vse kaj ti nekaj šteli bi h žepeka deti, i nigdar ti žal tuj nič bile nie, jer mirne navek spal si, jer svoj si mir navek mel, mir teri za nič na svetu dal nebi, a niti ni nemreš dati. Unda buš same mogel stati si, unda buš same mogel spredehnuti ak ti buju pajdaši najbolši te dali, jer nie same tak se vrnuti i poslušati unda gda te poslušati nečeju. A ak si hgreznul, ak si sam sebe z lopatu zakapati počel, unda ti nihči pomoči mogel nebu, jer sam te več štel neš. A penezi, a vse une kaj si senjaš, kak da nigdar niesi nič od toga mel - a navek si dobre zubljati znal, vse te ti bu na zubeke išle van, vsega mel buš čiste dost.

Tak se zmisljim kak mnogi sam put sposlušal kak su nekteri tam h daleke zemljice, gde Jezušek naš je hodil, kak tam su se od debeloče šteli spotrieti, kak im nie nič dražejše bile nek kak čem debši bi bili, kak čem več huse bi nametali, kak čem menj bi delali, čem več pili i kak bi hlovili prilikicu da bi se z bludem i naopačnami posli zvijali. E se zmisljite kak je od navek zapisane da prie bu deva čez iglenu vušicu prešla nek da bu uni kaj od bogatoče nezna kam bi z sobu – došel h carstve nebeske. Mnogi su nam pajdaši na te spozabili, mnogami je denes same do toga kak čem več bi meli, čem bolj bi jeli, da bi se čem na mekšejša ziceka h ljetrikice vozili i da bi čem bolj hmanjgovali, same da bi im vrieme h hladu prešle čem bržejše.

Druga je stvar e te hvredu je, e tak vriedi se h življenju vladati, e te je putec pravi, na te pitanje človek ma same jednoga odgovora, a odgovor je tie da nemre se drugač nek je te napravljene. Jedini putec je putec kaj Jezušek nam ga je zacajhal, i te kaj misljiš husebe da nihči te nie videl kak h žepe si penezeke Judine metal, te istina ti nie, navek Gospon te naš gledi, Njemu nihči pobeči nemre. Pogledati ili ne pogledati, riešiti ili se obračati kak vetrek puše, ili same pobeči, vrnuti se, postaviti se praf i krenuti se boriti, vse je te nekaj na kaj ti negdar nie najlježejše odgovoriti, jer vsaki med nami srčeke ma. Nehči ma male trdejše a nehči male mekšejše, nekteri bi a drugi morti i nebi, same je beteg ak kreneš prebrze i ne glediš kam si zašel, pak si meru neznaš zeti, i unda ti vse bu zišle tak kak zišle bu.

Gda skreneš, zaistinu več pomogla ti nebu niti nova ljetrikica teru si od provizijice dobil, niti nove stanje kaj su ti pomogli pajdaši napraviti, a niti vsa pijačica i vsu tu jele kaj na svietu videti ga moreš i kaj bi vse za njega dal. Zate, dok vrnuti se moreš – vrni se, naj za primera meti une kaj h življenju vse im bile je i bu te kak čem več i čem bolj bi zubljali. Zate ti je trieba se na vrieme obrnuti, skrušiti se i povedati Mu da nek ti ne zameri, da buš Mu vrnul se, jer vsakoga Un prijel je i bu, ak pokajal za istinu se i bu, jer Gospon naš vse nas ma.