Piše: mr.sc. Rajko Fureš dr. med.

Horvacke srčeke najčistejše je na svietu, srčeke tu straha ne pozna, a niti zločicu najhujšejšu. Srčeke tu, domače nam – same ma dobroticu husebe, ma une kaj nihči drugi na svietu nema nam, ma dišobu tera bu vsemi nami ostala, tera se i mora z ljudmi podeljiti, jer na svietu sam nihči živeti nemre, a niti te i trieba. Da srčeku nie ljehke bile – te vsemi dobre je poznate. Da se je srčeke mnogi se put i splašile, da mnogi se put nie mogle praf niti obrnuti – i te je dobre poznate. Kak god da se veli – življenje je navek življenje i življenje nie moći same tak pod svoje deti, jer kak god da bi štel ga pod perem si navek meti – furt ti se zmekne i pobegne tomu najmenj nadati i moreš. I kaj unda i povedati, e se z vsem tem more drugač ili je morti trieba male se zastanoviti, male se počinuti i prositi Božeka najdrajšega da za srčeke da ti une kaj največ ti trieba je – mira, i te da ničemu nigdar strahu nebi bile, kak niti nigdar smele biti nie.

Horvacke srčeke niti nie moči drugač otprieti, tu srčeke nie niti drugač mogle rade meti, niti ljudi, niti kraj najlepši, zagorski, horvacki. Srčeke tu nam jedine, kaj mame ga kak nekaj najvrednejšoga – čuvati nam navek je trieba kak une kaj kak najbolše bume vsemi za primera meli, primera da ne splati se zločestoće se dati, da se ne splati z betežnem igrati, da jedine je vriedne človeku dati i človek biti.

I kak god da h vrieme tu nie vsemi nami ljehke bile, a korizma bi triebala biti i vrieme najveselejše, iste tak sme vse te skup lježejše prebavili nek sme si te i mislili. Drugač te niti mogle biti nie, dok sme se zmislili kak Gospon je četrdeset dneve h pustinjice bil, kak ničega nie mel, kak se zločice prodati nie dal, pak je za vse nas tak pokoru napravil, da denes bi vsi mi skup nove si življenje zaslužiti mogli. I gda nehči tak poveda da nie mu ljehke, gda zaistinu i ljehke mu nie, iste tak trieba se zmisliti toga kak i pri nas nie nigdar ljehke bile, pak je življenje furt i furt znoviš dalše išle, da se zastanovile nie. Te kaj vsi skup triebame, kaj nam bi kak dužnost najvekša bila - je te da se puta držime, da nigdar ne skreneme, da se na kupu navek najdeme, da vsemi nam bi lježejše bile, da bi se h slogice najvekše mogli pokloniti Gosponu i fala Mu povedati. Da te je moči – te vsaki med nami zna, same je una druga stvar iste tak vriedna, a poveda da trieba i šteti, jer drugač se nikak vse te skup niti neda oddelati unak kak te triebale bi i bi.

Gda tak probame si rastumačiti – a kaj se vse te skup oko nas dogodile bu, kaj vse te na svietu praf za praf i je – unda morti bume vsi skup male bolj i videti mogli, morti i sprogledame. A da videti vsi skup praf bi i mogli, trieba nam je furt i furt se moliti, trieba nam je dober biti, trieba je pajdašem, vsemi na svietu – na pomoči se najti, nikak drugač. Te je une kaj na svietu nas drži, kaj nas je držale i kaj bu nas držale navek kak i vse une kaj su se poklonili, i kaj su h Oca, Sineka, Duha najsvetečnejšega verovali – z srčekem najčistejšem – Horvackem.

Otec, slava naj ti bu

Otec, slava naj ti bu
Naj slava bu i Sineku najdrajšemu
I Duhu najsvetečnejšomu

Kak je bile
Unda gda vse je počele
Tak i zdaj
I na čas
gda smrt bu nas
Z ovoga svieta odnesla
Na drugi

Amen