Piše: mr.sc. Rajko Fureš dr. med.

Nehči nada se, nehči si mislji da nie trieba nič povedati, nehči štel bi povedati kak nie trieba se nič po tom pitanju spremišljavati, da je same male trieba prijeti se posljeka, da nie trieba hitati se na krivi posel i na krivu stran. Pajdaši mnogi su se nadali kak je trieba na pravi se put obrnuti, a ti pravi put po njimi bi triebal biti uni put teri navek je na strane uneh kaj pri kopanje su.

A življenje ide furt drugač, življenje ma svoje dišobe, življenje nas največ put vse skup obrne tak da nezname kaj bi z sobu napravili, pak se nie niti za čuditi ak nehči prejde a z druge strani ak nehči nikak prejti nemre. Vsi skup, kak god da na broju su, kak god da su pofarbani same čakati moreju. Vsemi nemre dojti une kaj su si čakali, da te i čeme, da se cieli toga posljeka bi držati šteli, pak kak god da se bi štel toga posljeka prijeti negdar ti nič zbaviti nemreš. Dnev tak novi bu došel, pred očmi zagledati buš mogel prave vrieme, mogel buš mam prejti tam kam iti je trieba, na pravi put, h pravu dobu, na prave meste, tam gde več odavne iti je triebale.

Pajdaš kak pajdaš, e si tu, e maš, il si je il te niesi – te nekaj čist je drugač. Kaj povedal buš, kaj znaš ili kaj znal si je ili znati bi štel – te je nekaj čist drugačkoga. I unda gda ti „pajdaš“ če pomoči tak da ti nožeka pod rebre zapikne, ti kak najvekši poštenjak češ čem prie zbeči, a več je od prie poznate bile kak vse te zišle bu. E na svetu je i e more biti tak da pajdašeh ma, mnogi su si več put skore i mira pustili od toga da si misliju kak na svietu nie im nikoga gdo pomoči bi im triebal, a pak vsaki si želji da mu se nehči na pomoči najde.

Gdo bez pajdašeh more i e je same tak bez mira živeti moči. Pak se otom bi šteli spominati kak same bi si putačicu triebale napuniti i da se za nikaj drugaj ne splatiti vrieme gubiti, jer vse dojde i vse prejde tak kak nebi biti triebale. Vse te skup drugač bi bile da je male več mira med vsemi nami a i h vsakomu med nami. I unda pitanje štel vsemi bi povedati, pitanje kaj na srčeku mam -  e zaistinu na svietu živeti se pez pajdaše more? E gdo med nami za navek bu i more te biti, pitanje je tere ma odgovora same jednoga – a tie odgovor veli da same Gospon je od navek i za navek. Vsi kaj su kak zrnjiče peskeca igdar po zemljive ove hodili, moreju same cajte življenjske tere po svietu su hodili, po malu obračati. Niti hčera, niti denes a niti zutra, bez pajdašeh se nemre, nemre se i moči se bile nie, jer kratek je cajt kaj sam ga moreš bez pajdašeh meti.

A za vse nas, kakvi god da jesme, maljički, veljiki, suhi ili debeli, zutra dojti mora, jer vrieme se zastanoviti nemre. Kak god da su pojedini dukali i huškali a drugi kak su se bogčeki od žalosti šteli spotrieti, nie se za veseljiti tomu, jer zutra se te vsakomu med nami vse skup more dogoditi, za nektere i tak da se neju siromaki mogli zestati sami z sobu. Vsemi dogodile se je ili se bu dogodile da dnev poklje bu došel, kak god da nam pobegne negdar da čeme najpametnejši biti a sebe ne vidime, iste tak se zestanoviti morame, jer ak se zastanovili na vrieme neme unda niti videti mogli neme. Tak kaj je jutranjka pametnejša od večerke, tak je i vrieme vraštve za vse une kaj nezname kaj bi z sobu, z vsemi poljek ili z vsem kaj sme življenje ciele šteli si poljek srčeka meti. Dobri triebame biti, nigdar nagli, vrieme nek nam nigdar nebi bile une kaj bi nas gnjele nek une kaj bi ga za pajdaša meli, i mam vse bu unak kak je trieba biti, tak kak su nas naši starejši vučili, a nigdar nas naopak vučili niesu.