Pune se toga i dobroga i lošega događale prošlih par tjedni pa o semu o čemu sam štel nisam mogel pisati. Sad je prilika da nekaj od toga nadoknadim.

One kaj me inače največ motivira v političkomu smislu je ravnopravnost ljudi. Ta ideja nije baš bila popularna v zadnje vreme. Nakon rušenja socijalističkoga društvenoga uređenja kapitalizam nam je došel na velika vrata uz veliku pompu. Odjemput je se one kaj je bile bil mrak, a se kaj je došle bile je život i sloboda.

Jedine kaj nišči nije spominjal bila je cena te slobode.

Največa obmana zbila se pod zastorem nacionalnoga ponosa iza kojega se dogodila i največa pljačka od stolječa sedmoga.

Naši ljudi nisu bili u stanju razlikovati socijalnu i ekonomsku politiku od zaštite nacionalnih interesa.

Zakaj je slobodna i neovisna Hrvatska morala bit v iste vreme i kapitalistička?

Kaj bi se dogodile da sme se za svoju slobodu borili v okviru socijalističkoga društvenoga uređenja?

Zakaj ne bi bile moguče višestranačje v okviru socijalizma?

Najozbiljneše mislim da sme za vreme rata trebali ostati socijalistička zemlja, a prijelaz v kapitalizam delati kad se društve oporavi od rata i kad se ljudi moreju bistre glave baviti s politiku i ekonomiju.

Zakaj mi o takvi tema nej mogli diskutirati bez da nas nešči optuži da delame protiv države?
Rat i kapitalizam išli su v prilog kriminalu koji je tu situaciju iskoristil, a ljudi teri su bili hipnotizirani z hrvatstvem nisu bili u stanju zdravoga razuma da bi mogli kazniti svoje velike hrvatske vođe koji su im poklonili državu, ali su im zeli se druge.

Sad kad se stvari pomalu otkrivaju nemreme se načuditi kaj se se događale, a da za te nisme znali ili nisme šteli znati. Nije mi drage kaj to moram reči, ali z nami  su v devedesetima  vladali kriminalci!

I denes kad radni ljudi, od kojih su mnogi bili za vreme rata s pušku v ruki, moraju  h vlastite države protestirati da bi se izborili za osnovna prava koja jedan čovek v civiliziranomu svetu mora imeti, vreme je da oni koji vodiju politiku, a prije sega oni na vlasti, osudiju kriminal i odrekneju se onih iz svojih redova koji se ž njim baviju!

Kaj su delali Šušak, Pašalič i veliki broj onih za koje nezname? Protiv takvih dokaze najdeme i v novina, ali ih nijeden sud nije optužil.

Pri nas si se znaju ali se nič ne događa da se stvari srediju.

Dok 40.000 ljudi po dežđu protestira i bori se za najosnovneša ljudska prava političari razmišljaju kak te demonstracije obrnuti v svoju korist, a na štetu onih drugih! Sumnjam da se nešči od njih ozbiljne zamislil nad tim.

Kad buju naši birači počeli više razmišljati o politike, kad buju postali birači, a ne navijači onda buju i političari počeli razmišljati o biračima.

Žalosne je da par meseci nakon izbore za parlament ljudi svoja prava moraju iskati na ceste, meste da im ih osiguraju oni koji su z njihovi glasi došli do položaja.