Piše: mr.sc. Rajko Fureš dr. med.

Dok su nas nekteri tam pajdaši na lete vučili da vekše nam vriednosti na svietu nie nek je te zvezdica najčrlenejša i da bi vsi triebali jednaki biti, vsi sme mi skup kak te je skore pedeset ljet trajale hute verovati i počeli. Duge nam je triebale dok sme mogli sami sebe nekaj za rastumačiti, kak te da je najemput vrieme došle, vrieme h teromu vse une za kaj su nas tulike lete vučili da je najbolše i najvrednejše – več nič vriedile nie.

Človeku za istinu, kak god da veliku glavu i ma, vse te skup najjasnejše niti biti nemre, mam mu se nekaj kazati more kak une kaj je najnaopačnejše, te ti je navek i furt tak, kak god da si bi nekteri med nami rastumačiti nekaj i drugač šteli. Kak god da nekteri su šteli nam povedati da je une kaj črne je bile, praf za praf biele bile, tak kak su lete prešle. I kak sme vse te skup mogli na sveklinice prave videti, tak sme mogli male po male sami do toga dojti da se niti z črljenami a niti z črnami nemreme pomoči, a niti od njih nič bogzna kaj nahčiti.

Kaj je une do čega je trieba držati, z čem je trieba se špinčiti, kaj vse a največ decu je našu vučiti trieba?! Vučiti vse a največ sami sebe trieba je da sme najveselejši kaj mame svoju Domaju – Domaju Horvacku, kaj sme Domaju vsi skup – kak jeden, na noge postavili. Najvekše i najbolše je h cielomu tomu i te da sme vsi skup za Domaju Horvacku dihali kak jeden, da ju niesme dali čifutami teri su vse meli, teri su na mehkami stolčeki skore osamdeset ljet sedeli, pak ih je za razmeti kaj se niesu dali z Horvacke.

A kak zločice dojti kraj mora, zločice vsake, tak se i vsake vrieme, za vse trute i parazite ziti more, jer niti neme se za navek nekoga cecati, a da te tie zdržati more, niti se te trpeti za navek da. Pri nas je tak da ljudi horvacki čudaj toga zdržati moreju, da se moreju vsikud obračati - same da bi za Horvacku domaju živeli, pak je i za razmeti ak nekteri tam moreju tak i zvlječi vse une kaj se zvlječi triebale nie. Med čudem toga kaj najbolše je, more i nekaj naopačnoga porinuti, same je trieba na vrieme se zastanoviti i vsemi povedati da sme te razmeli i da na vrieme sme se zastanovili na putecu najbolšemu.

Unie lucki su si tam spremišljavali i husebe duge študerali da nie im same tak pustiti une kaj su na lete drli, kaj su na lete cecali, pak ih je i za razmeti, te čifuteka najdrajše, kaj niesu šteli h miru vse te pustiti. I vse su si tak spremišljavali da straha im nie, da mulčeki nemaju kaj iskati, jer su tie mulčeki z terami posljeka maju – goli i bosi. A za istinu niesme skore nič meli, za istinu su za vse nas same jeden plan meli, da nas vse hništiju i da nas več niti bile nebu. Jedne se same pripetile, a te je bile da se niesu nadali da se buju na najtrdejšu koščicu napiknulji, da im se buju zubeki na zemljice Horvacke potrlji.

A bili sme na kupu, vsi skup v horvacke domaje, bili sme kak jeden, bili sme jeden za drugoga, nie nam nič te vriedile gdo je bil prie vižejši a gdo bil je menjši, vsaki teri je Horvacku rad mel bil je najvrednejši, kak te je i trieba. A vrieme je jedine kaj je za razmeti ga, kaj se same male more otpirati kak nekaj najvrednejšega, vrieme se male po male otpira, vrieme se male po male kaže kak je i trieba.

I tie naši najdrajši pajdaši, teri nigdar niesu niti bljizu bili tomu kaj zvale se je renesansa, barok ili pak rokoko, kak god su si plana napravili, plana teri se je zval – „ak prejde, prejde“, nisu se bogi čifuteki mogli niti sami sebe načuditi. Tak im je vse te zišle čiste naopačne, niti denes siromačeki još k sebe dojti nemreju, jer nie im jasne kak unie kaj nič meli niesu su njim vrnuti mogli. Nie im den denes najjasnejše kak su po noseku dobiti mogli, tomu se nadali niesu a niti te razmeli su a niti denes te razmeti moreju. Odgovor je jeden jedini, nie ga moči drugač niti povedati, nek da dok srčeke maš, dok svoje rad maš, dok vse za domaju Horvacku, ljudi i kraj jedini bi dal, da nihči ti nič nemre. Te uni kaj su si govorili „ak prejde, prejde“, razmeli niesu a niti den denes ne razmeju, a niti razmeti moreju. Vse im te se dogodile jer niesu razmeli, jer mogli niti razmeti Horvacku krunicu za vratem.