Več duže vreme sam mislil nekaj napisati na temu hrvackih generale, ali nisam mislil da bu povod za to takva tragedija. General i ratni heroj, za kojega bi sakomu Zagorcu trebale biti drage kaj je z našega kraja prek noči je od heroja postal ubojica. Vbil je čak staru ženu i dete, kaj se ne da razmeti, a kamoli opravdati. Čovek koji je prešel i preživel ratne strahote i bitke nije mogel uživati v miru v svoje države koja mu je pak dala status generala i heroja.
Javnost je više menje znala za nekakve nerede tere je znal izazivati v alkoholiziranomu stanju, ali male je doj znal kolike je njegva psiha zbilja bila poremečena. Na žalost, tek se sad otkrivaju incidenti, maltretiranja, zlostavljanja i zastrašivanja onih koji su mu se našli na putu. Odgovorni su to dobre znali i prije.
Saka čast sakomu koji je branil ovu zemlju. I sam sam bil jeden od tih, ali branili sme domovinu jer sme šteli dalje normalne živeti i delati, a ne maltretirati ostale. Onaj ko svoj status branitelja koristi da bi kršil zakone države teru je stvaral, nemre se zvati braniteljem jer uništava osnovnu ideju domoljublja.
Verujem da se v slučaju Koradea dela o teške psihičke bolesti, jer stvari koje je delal i kak se je ponašal prije i onda ovaj pokolj na kraju, nemre napraviti čovek zdravoga uma.
Zdrave pameti su pak bili oni koji su mu omogučili da bez posljedica divlja i na kraju napravi kaj je napravil, a da ga prije toga sistem nije sprečil ni kaznil za veliki broj teških kršenja zakona.
Nišči o tomu ne govori, ali bez obzira na svoje ponašanje, Korade je bil ugledni član HDZ-a.
Sečam se kad sme nosili kandidacijske liste za prošle lokalne izbore. Listu HDZ-a donesli su Ivan Jarnjak, Ivan Korade i Milivoj Škvorc! Pa kaj ovi dva nisu znali da je Korade osoba protiv koje se vodi kazneni postupak? Osoba optužena za nasilje i narušavanje javne sigurnosti?! Zakaj su obadva, denes ugledni članovi Sabora, pristali na to da bu njihov suradnik nasilnik v sukobu z zakonem? Istina, ima velike zasluge v Domovinskom ratu, ali nakon toga je maltretiral vlastite suborce i građane. A baš su mu njegvi politički sponzori dali potporu i podršku da bez kazne i prepreke dela kaj hoče i da na kraju napravi pokolj i v svojem ludilu presudi i sebi.
Teške je razmeti kaj mu se v glave dogodile, ali je teške razmeti i one koji su za njegve probleme znali, ali zu zbog vlastite koristi iskorištavali njegov generalski status da bi skupili političke poene. Da su ga na vreme sprečili da divlja, da mu nisu davali potporu i tretirali ga ko uglednoga člana svoje zajednice denes bi se morti lječil ili bi bil pod nadzorem, ali bi bil živ i dalje bi ostal ratni heroj, general i oni koji su zbog njega denes mrtvi bili bi živi.
Mi Zagorci nemame pune uglednih ljudi na visokom položaju. Ivan Korade bil je ponos za se zagorske borce. Prošlih dane taj je ponos pokopan ž njim i z onemi teri su od njegve ruke pali.