Piše: mr.sc. Rajko Fureš dr. med.

Kaj vse ti te h življenju trieba, te kaj se prevračaš h mehkomu stolčeku, teroga tak duge si si senjal, e te je vriedne bile da prodal si se i kaj si z mrčnjakem najvekšem se sparil i dušicu mu prodal za male peneze, tak da i une male kaj si mel več mel neš. Tak ti te je, e moreš kaj pametnoga povedati, e moreš za koga reči da pravica na svietu je ili nie, kaj človeku rastumačiti otom zakaj mrčnjaki nas naopak vučiju i z nami šteli bi krmaniti.

Nehči bi povedal da tak je bile i bu dok svieta je i veka, da te tak je i da te zmeniti neda se. Kaj bogčeki znaju, največ ljudi nate reči same bu z glavu h nadol pogledala i bez reči prešla čem dalše, da morti po noseku nebi došle nekaj toploga kaj nigdar tuj smele biti nie. A i vse te se more z druge strani gledeti, pogledati, morti nekaj male i razmeti ali iste tak i ne razmeti baš nič. Tak ti vse te skup zide, tak ti se vse te skup okrene, tak da nie ti niti moči vse skup praf povedati kak življenje ti ide, kak te piče i kak tuj ti čiste nič nemreš.

E vriedi kaj povedati, e vriedi kaj oddelati, e je vriedne dalše glavu h nadol držati ili se je trieba držati vsega unoga kaj je triebale biti unak kak si nihči nie mislji. E je bile ovak ili je triebale biti unak, nekteri buju povedali – čist vse jedne je. Dok god tak si bume gruntali, dok si god dopovedati mogli neme, vse bu tak išle tam gde se več nikam genuti nemre, a te morti i nehči če.

Da h kmičnom bez sveklinice se neda gibati, da bez sveklinice neda se živeti, te vsemi mislim da nie niti trieba preveč tumačiti. Najgorše je gda se te ne razme, gda se te ljudmi rastumačiti neda, gda uni teri te razmeti vsikak triebali bi – te ne razmeju. Te najgorše je, a kak god da se bi štel zestati z nekterami tam pajdaši, največ put vse te zide ti tak kak da se z zidekem spominaš, kak da gluhomu povedaš. Štel ti nebi da ne razme te se, štel bi se obračati, male po male, i štel se bi šraf postaviti da bi vse te drugač iti mogle.

Te nie za zameriti, te je za posluhnuti unak kak si se triebal nahčiti vse une kaj dobre je i posluhnuti, jer življenje nie navek tak dobričke da te bi čakale. Čakati te moreju i čeju same nekteri, mamek i tatek, dečica i pajdaši, vsi uni kaj znaju kaj pravica je, kak do pravice držati i za pravicu se postaviti. Te da se je trieba postaviti praf, te je nekaj kaj vsemi na pameti bi triebale biti, a ne da unda gda se nekaj oddela tak kak triebale nie – vsi mam iščeju na koga buju z prstekem kazali i koga bi pokrivili da nie praf zišle. Nie se trieba tak obračati, obračati se je trieba praf kak je i trieba, jer nikak drugač se niti neda obračati, nigdar se nesme človek dati sprevarati i prodati za čižljeke.

I tak duge dok h kmice vsi skup bume, dok god da nas kmica bu čem dužejše držala i dok god da se bu mogle spotrieti une kaj se spotrle nie, do toga cajta niti mogle nie se zmisljiti nič druge z vsega toga – nek jeden veljiki naopačnjak. A kaj i povedati dok pajdaša vidiš kak se mudre drži, kak si frizuricu popravlja i dok se mudri, jer kak se i nebi mudril gda vse su pajdaši hu njega hložili. Pak zdaj te i more si žiti, jer dobre im vrnul je vse kaj za njega su dali, vse kaj mogel je - je sprodal, vsigde gde bil je vse je hništil, ali kaj je tuj je, jedine je pravica ostala te da te nebu z sobu odnesti mogel, kak i mnogi prie njaga vsa bogatstva kaj za sobu su meli – niesu z sobu odnesti mogli.

Tu življenje, tu kmične vrieme, vse te senje, vse za kaj se držati moreš, kak god da te stišče i kak god da dihati ti neda beteg tie trdi kaj mel si ga poljek sebe, vse te ti je navuk teroga si nigdar pozabiti nesmeš. I nigdar kak god da počinuti največ si češ, nesmeš si sveklinu kaj h glublini ju maš – zgasnuti, jer jemput gda kmičnomu daš da z kmicu te zažmekne, več neš mogel nikam, kak da buš priprt h rešteku najgoršemu.

Sveklinicu zate nie trieba nigdar od sebe pustiti, sveklinicu trieba i z pajdaši podeljiti, jer zate sme ju i od Najvekšega dobili, da bi ju kak najsvetečnejšu i najveselejšu reč – med ljudmi povedali i živeli, kak dečici mu.