Piše: mr.sc. Rajko Fureš dr. med.

Pravice se držati trieba, pravice za vse, drugač nikak moči nie jer nie same tak gda se počneš spremišljavati kak nekterami pajdaši i nie unak kak triebale biti bi, kak se bi radi sladili i kak bi vsemi povedali une kaj povedati je trieba. Morti nekterami i nie vse te skup po voljice, morti se nekteri med nami i nemre h vsemu tomu niti snajti, ali kaj je tuj je, življenje nigdar nie nikak drugač bile nek trde i žalosne- ak ne verješ. Same ak verješ nadati se moreš da se nekaj spremenile bu, da bolše bu.

Dok se zbudiš h jutriče rane, dok se zdigneš i z očmi glediš - prve kaj buš videl su trdanjki dišeči, vse kaj zove te da ne zdigneš se još, da još male pod poplanem se obračaš, jer čem ruku porineš mam te bu krenule nekakve zimotrene stanjiče tresti. Gda se unda jedva prokljuješ i kreneš se zrihtati, podbriješ se i zubiče ščistiš, unda moreš ljetričicu hvužgati. Akumulatorek ti je več male slabejši, pak ne lovi mam, ali gda male po male zakurbljaš unda se i zalaufa ti, tak da ljetričica krene prema posleku i tak da se male po male more oddelati une kaj se je več odavne oddelati triebale, a te nie bile nič druge nek jeden domači hvritnjak.

Kak god senje vsaki med nami ma, kak god da senje i čeju nam nekaj druge povedati, kak god da se če male po male i otprieti, vse te skup se trieba na zemljicu deti prie ili kesnejše, gda kreneš na posljeku spominati se i švicati od ve do ve. I tak dnev za dnevem, tak furt od gda zase znaš, tak navek i za navek, kak god da zvlječi bi se štel tak vse te skup neda ti da zvlječeš se i kreneš drugač. Gda si več za nič pak h ljetriku ti je za iti, morti male i skreneš h dučaneka koljičice nametati i penazeke od sebe otpustiti, a i ovak i unak ih pre male maš – kak i mnogi med nami, tuj nič novoga nie a niti bu. Gda takef nikakef doma i dojdeš vsi te skup čakaju tak kak ftičeki, same im se putačice videju, mam vsi skup nate laziti bi šteli, a tebe je bogčeku same do toga da si počineš. Unda gda i te več nemreš moraš iti na zemljicu se male pokazati, moraš vsemi povedati kaj delati buš išel, kak ti je bile i kam buš išel. Male buš morti i h trsiču pogledal kak je zima bila, kaj su zajčeki i srnice hništili, i več se nič ne vidi, več je vse te skup tak zišle tak da niti drugač niesi mogel traktoreka zapeljati na dvorišče h sušu. Čem si do hižice došel pak vse ti se odsekle a mam si dobil novoga zadatkeka, mam peljati si mogel dečicu na popevanje ilji tancanje, dečicu je trieba unda počakati i prema domeku ih vse skup dopeljati, kak svoje tak une od susedof. Gda domu svojemu dojdeš pak najmenjšega trieba obrihtati, pomoči ženjščice i vrieme prejde tak da niesi se znal zestati sam z sobu. Gda vse se zgasi, još male moreš pogledati teljevizoreka, ali kak god da filmeka štel si pogledati bi, mam ti se pred očmi kmičiti počne, mam se obrneš tak da več te niti potresek zbudil nebi. A h jutre pak znovič, i tak pak i pak, i življenje kak i vse skup prešle bu, a da se niti ti a niti vsi kaj su z tobu neju obrnuti mogli, neju se mogli otkoturati praf za praf.

Unda se vsi skup stati triebame, vsi skup morame vsikud povedati da tak je kak je, da nie nič za zameriti nekterami kaj drugač niti znali nebi povedati ili delati nek ovak kak i kaj delaju, a življenje i nie nič druge nek je te kaj je.

Unda gda ti nehči povedati počne, kak bi ove ili une i kak pravice se bi triebale držati, vse ti te skup dojde nate kaj došle je, a nie došle drugač nek je došle prie nek si se hitil tam gde hitil si se i unda tak i ostal žmečki i trdi.

Gda si tak  počneš povedati da nič se napraviti neda, da vse je ovak i unak zacajhane, da se nič spremeniti neda, unda ti je vse skup te prešle tam gde se nadal niesi a glavica ti se zestala z zidekem. Pred očmi ti mam se razdenile, mam si pred sobu videti mogel navuk najstarejši, navuk kaj te furt vuči da se nesme stati, da mora se napre iti, da mora se človek biti, človek, pajdaš, brat za cieli svet, rodni kraj, najdrajši kaj, Zagorje horvacke, horvacku domaju i sviet cieli.

Vse te jedine je moči same ak se vsi skup navuka Jezušekovoga držali bume, nikak drugač.