O bolnice sam pisal dok još nije bila preseljena. Spomenul sam naša očekivanja, novu zgradu i priliku da od nje napravime pravu bolnicu. Pisal sam onda kad nisam znal kak buju z bolnicu zadovoljni oni koji buju, na žalost, morali koristiti njezine usluge.

Napisal sam onda i te da su bolnica ljudi koji nutre delaju, a ne novi zidi v tere su se preselili.

Čoveku pune toga nije jasne kad stvari gledi z mesta promatrača.

Neki dan sam bil prisiljen koristiti usluge zdravstvene zaštite za člana svoje familije.

Morali sme na Bračak. Bolnica Bračak je na odličnom mestu ak imate auto.

Kak je bila nedjelja odma sme došli v ruke ljudi na hitnomu prijemu. Dežurni na odjelu kirurgije pokazali su način na koji bi se trebali tretirati pacjenti. Veseli kaj je se prešle bez težih posljedica, kaj su nam ljudi koji delaju v bolnice pokazali da čovek more na nekoga računati kad je v situacije da mu je u pitanju zdravlje, vrnuli sme se doma uz dogovor o kontrole za dva dane.

Za dva dane, radni dan. Kolika god da je nova bolnica velika je gužva. Veliki hodniki puni ljudi, ali na su sreču tam su prijemne porte pak morete pitati kam i komu se javiti.

Na prvom šalteru uputili su nas na drugi šalter, na drugomu šalteru nekakva sestra jedva da je digla glavu i rekla da ideme nekam dalje, negde dalje, na vrati još jedna sestra ne zna po kaj sme došli i veli da morame na šalter. I zdravomu bi pukel film, a kamoli ake je čovek još betežen. No službenici bolnice s teremi sme kontaktirali valjda misliju da se prema običnomu čoveku moreju ponašati kak očeju, a oni jači ionak ideju prek veze, pa im šalteri ne trebaju. Nišči nam nije rekel ni dobar dan, a kamoli da bi se nešči potrudil da nas uputi i pomore da zbavime to po kaj sme došli.

Takev način ponašanja ne omalovažava same pacjente, nek i veliki broj medicinskoga osoblja koji delaju svoj posel kak treba i pomažeju da toliki ljudi dobi kvalitetni zdravstveni tretman.

Činile mi se ko da iščem visoke pozicioniranoga političara, a sestre na prijemu imaju zadatak otpiliti nas da do njega ne dojdeme, ko da sme došli na opčinu pa nas pošiljaju od vrat do vrat da bi nas se rešili.

Kad je nekomu loše pomaže več i topla ljudska reč! No taj dan v Bračku nisme mogli čujti ni suvisle, a kamoli tople reči. Meste toga slali su nas ko idiote od jednoga do drugoga šaltera same da im dame mira.

Čoveku na glavne porte trebale je par minut da bi opče glavu zdigel i pogledal doj stoji pred pultem, a onda na banalne pitanje, da li dela taj i taj doktor, odgovori - nemam poima. Nisam štel scene delati, ali sam si mislil, pa ak nemaš poima onda odi doma. V bolnice tera je napravljena da bi naši ljudi imeli bolju medicinsku zaštitu trebaju delati oni teremi je stale da betežne lječiju i da im pomoreju. Ona hrpa ljudi na hodniku nije dosadna rulja nek naši Zagorci teri imaju problema z zdravljem, a to nije i nesme biti predmet nečije zafrkancije ili nebrige.

Žal mi je i onih teri v bolnice delaju svoj posel kak ona dežurna ekipa kaj sam ju spomenul.

Mislim da je na rukovodstvu bolnice veliki posel i odgovornost da napravi reda i od nove zgrade napravi novu bolnicu, onakvu kakvu sme šteli da bu, a mi si skupa nesmeme se šparati kad treba pofaliti dobre, ali ni onda kad treba dati kritiku.

Javnost mora biti ta tera bu zlječila našu bolnicu od nebrige, indolencije i birokracije, da bi bolnica onda mogla liječiti nas.